न्युयोर्कमा ७१ जना विद्यार्थीको कोठासम्म राहत वितरण गरियो

May 11, 2020


कोरोनाको कारण न्युयोर्कमा दुख पाइरहेका नेपाली विद्यार्थीहरुलाई कोरोना भाइरस विरुद्ध जुटदै आइरहेका कोरोना सचेतना तथा सहयोग समुहले तेस्रो चरणमा ७१ जना नेपाली विद्यार्थीहरुलाई राहत वितरण गरेको छ । यस पटक करिब एक महिनालाई पुग्ने गरि राहत वितरण गरेको समुहले जनाएको छ ।

समुहलाई यस पटक प्रबासी नेपाली एकता मन्च अमेरिकाद्वारा ३० जना बिद्यार्थीलाई, तामाङ सोसाइटी अफ नर्थ अमेरिकाद्धारा ३० जना विद्यार्थीहरुलाई र दर्शन ठकुरी समाज अमेरिकाद्वारा ११ जना विद्यार्थीहरुलाई खाधान्न खरिद गर्न आर्थिक सहयोग गरेको थियो । त्यस्तै न्यूयोर्कका समाजसेबी लीला राईद्वारा ७१ जना विद्यार्थीहरुलाई काउली र लेटेस सहयोग गरेका थिए ।

‘ कोरोनाले दुख पाइरहेको नेपाली विद्यार्थीहरुलाई हामीले तेस्रो पटक राहत वितरण गर्न पाएका छौ ’ समुहका सदस्य अच्युत सिग्देलले भने(‘ विद्यार्थीहरुको अवस्था देख्दा उनीहरुलाई सहयोगको निकै जरुरी भएको महसुस भयो’ । सिग्देल लगातार तेस्रो पटक विद्यार्थीहरुलाई राहत वितरणमा लाग्दै आएका थिए । उनका अनुसार हरेक चरणको राहत फरक फरक विद्यार्थीहरुलाई वितरण भएको थियो । न्युयोर्कमा विद्यार्थीहरुलाई सामाजिक सन्जाल, व्यक्तिगत सम्पर्कसंगै भ्वाइस अफ युथ र युनाइटेड नेपालिज स्टुडेन्ट एसोसियसनको सहयोगमा विद्यार्थीहरुको खोजि गरेर राहत वितरण गरेको उनले बताए ।

यस पटक ७१ जना विद्यार्थीहरुको कोठासम्म सामाग्री पुर्‍याउनका लागी स्वयमसेवकहरु सिग्देलसंगै राज कुमार बिष्ट, बिष्णु राना मगर, पासाङ शेर्पा, मिलन शाही, सतेन्द्र शाह , राक्पे छिरिङ्ग लामा, अनिल पाण्डे, सुबाश लामा, नबराज खड्का, शिव बानिया, बिजय मान सिंह, टेक बम, लाल शाही, उमा तामाङ, छिरिङ्ग लामा, यम लामा, भरत संग्रौला, लाकेन लामा, दीपेन्द्र लामा र आनन्द बिष्ट रहेका थिए । राहत वितरण पछि स्वयसेवकहरुलाई मुस्ताङ् थकाली किचेनका नबीन सेरचन र शर्मिला सेरचनले निशुल्क खाना सहयोग गरेका थिए ।

 

समुहले यस अघि पहिलो पटक ४६ जना विद्यार्थीलाई, दोस्रो पटक ५६ जना बिद्यार्थीहरुलाई र शनिबार ७१ जना विद्यार्थीलाई खाध्या सामाग्री वितरण गरेका छन । यो समुहले पहिलो पटक आफनै समुहमा रहेका सहयोगीहरुबाट संकलन गरेको रकमले खाद्या सामाग्री खरिद गरेर वितरण गरेका थिए भने दोश्रो पटक सुदुरपश्चिम समाजले २५ जनालाई र कानुन व्यवसायी गिरिजा गौतम दम्पतिले १० जनालाई, बाकी दाताहरुले दिएको रकमबाट किनेर वितरण गरेका थिए । त्यस्तै डा बंगालि चिकित्सक फिरदोज खण्डकारले सबै विद्यार्थीहरुलाइ खाजा दिएका थिए । समुहले राहत दिएको विद्यार्थीेहरु बढि क्विन्स क्षेत्रमा बसोबास गर्नेहरु थिए भने म्यानह्टन र बु्रकलिनमा रहेका विद्यार्थीहरुले पनि राहत पाएका छन ।

‘ एफवान स्टाटसमा रहेका विद्यार्थीहरुको माग भएमा यो किसिमको सहयोग अर्को हप्ता पनि हामी दिन तयार छौ’ समुहका संयोजक आनन्द विष्टले भने -‘ विद्यार्थीहरुले भोग्नु परेको यो पिडामा सहयोगी हातहरु तयार भएकोले हामीलाई दिन सजिलो भइरहेको छ ’ । नेपाली विद्यार्थीहरुलाई तीन चरणसम्म राहत वितरण कार्यमा राजकुमार विष्ट, अच्युत सिग्देल र विष्णु राणामगरको विशेष भुमिका रहेको संयोजक विष्टले बताए ।

सम्बन्धित समाचार