समोआमा दादुराबाट ८१ जनाको मृत्यु

December 26, 2019

एजेन्सी– समोआ सरकारले दादुराको महामारीबाट ८१ को मृत्यु भएको पुष्टि गरेको छ ।

मध्य अक्टोबरबाट सुरु भएको यस दादुरा प्रकोपबाट हालसम्म ८१ जनाको मृत्यु भएको सरकारी स्रोतले जानकारी दिएको हो ।

समोआमा दादुरा रोग निगरानी टोलीकाअनुसार एक पाँच वर्षीया बालिकाको मृत्यु भएपछि सो सङ्ख्या ८१ पुगेको सरकारले बिहीबार जारी गरेको विज्ञप्तिमा जनाइएको छ ।

दादुराको प्रकोपबाट ५ हजार २१७ व्यक्ति सङ्क्रमित भएका छन् । २४ घण्टाभित्र नौ जनामा दादुराको सङ्क्रमण भएको जनाइएको छ ।

सङ्क्रमित ४३ अस्पतालमा भर्ना छन् । ती मध्ये १० जनाको अवस्था चिन्ताजनक रहेको जनाइएको छ । केही समययता समोआमा सार्वजनिक जमघटमा प्रतिबन्ध लगाइएको छ । दादुरा असाध्यै सङ्क्रामक भाइरल रोग हो ।

बुधवारसम्म समोआमा लगभग ९५ प्रतिशत दादुराको खोप लगाइएको सरकारी स्रोतले जनाएको छ ।

सम्बन्धित समाचार