प्रदेश २ बाट धेरै सिट ल्याएर पहिलो दल बन्ने रणनीति बनाउदै कांग्रेस

२०७४ श्रावण ५, बिहीबार १६:३५

काठमाडौं । स्थानीय तहमा दोस्रो बन्न पुगेको नेपाली कांग्रेसले असोज २ गते हुने प्रदेश दुईको स्थानीय तहको निर्वाचनमा एक सय भन्दा बढी सिट जित्ने रणनीति बनाएको छ ।

बिहिबार काठमाडौंमा आयोजित २ नम्बर प्रदेशको राष्ट्रिय भेलामा कांग्रेसले १०० सिट जित्ने टार्गेट प्रस्तुत गरेको बैठकमा सहभागी एक नेताले बताए ।

त्यस्तै तराई÷मधेसमा आफ्नो प्रतिस्पर्धी मधेसी दल नभएर एमाले भएको पनि दाबी गरेको छ । भेलालाई सम्बोधन गर्दै कांग्रेस प्रभावशाली नेता विमलेन्द्र निधिले दुई नम्बर प्रदेशको चुनाव कांग्रेसको लागि प्रतिष्ठाको विषय भएको दाबी प्रस्तुत गरेका थिए ।

उनले अघिल्लो चरणको चुनाव पार्टी्भित्रकै गुट–उपगुटका कारण तथा अन्य प्राविधिक कारणले हारिएको उल्लेख गर्दै तेस्रो चरणको निर्वाचनबाट पहिलो बन्ने दाबी गरे । उनले भने,‘हाम्रै कारणले पहिलेको चुनावमा हारिएको हो, तेस्रो चरणमा अघिको क्षतिपूर्ति असुल गर्ने गरी पार्टी अघि अगाडी बढ्छ ।’

भेलामा उक्त प्रदेशबाट निर्वाचित सांसद, केन्द्रीय सदस्य, जिल्ला सभापति र पराजीत जिल्ला सभापतिहरु समेत सहभागि छन् । अहिले देखि नै चुनावी अभियानमा लाग्दा पार्टीभित्रको गुट कमजोर हुने र एकतावद्ध भएर निर्वाचन जान सहज हुने नेताहरुको विश्वास छ।

सम्बन्धित समाचार