प्रचण्डले भने–घोषणापत्र राजनीतिक स्थायित्व र आर्थिक संवृद्धिमा केन्द्रित
काठमाडौं । प्रतिनिधिसभा तथा प्रदेश सभा निर्वाचनलाई केन्द्रित गर्दै नेकपा एमाले र माओवादी केन्द्रले साझा घोषणापत्र सार्वजनिक गरेको छ ।
काठमाडौंको तीनकुनेस्थित रोयल ब्याङ्क्वेटमा एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहालले घोषणापत्र संयुक्त रुपमा सार्वजनिक गरेका हुन् ।
घोषणापत्र सार्वजनिक गर्दै एमाले अध्यक्ष ओलीले यो घोषणापत्र सर्वोत्कृष्ट घोषणापत्र भएको दाबी गरे । उनले भने, ‘यो सर्वोत्कृष्ट घोषणापत्र हो, यो चुनावी घोषणापत्रमात्र नभएर देशको विकासको प्रतिबद्धतापत्र हो, ग्यारेन्टी जस्तै हो ।’
यस घोषणापत्रमा ग्यारेन्टीका पाँचवटा विषय रहेको उनले बताए । भने, ‘राष्ट्रियताको सवालमा, लोकतन्त्रको सवालमा, राष्ट्रिय एकताको सवालमा, शान्तिको सवालमा र विकासको सवालमा यो ग्यारेन्टी पत्र हो ।’
माओवादी र एमालेले पटकपटक सरकारमा बसेर मिलेको उदाहरण प्रस्तुत गरिसकेको अवस्थामा कुनै शक्ति अहिलेको मिलनले आत्तिन नहुने ओलीको भनाई थियो । कांग्रेसप्रति लक्षित गर्दै ओलीले भने, ‘एमाले र माओवादी मिलेर पटकपटक सरकार चलाएकै हो, अहिले चुनावमा मिल्दा कसैले खुट्टा बजार्ने, कसैले कपाल लुछ्ने जस्ता काम गर्न थालेका छन् ।’
माओवादीको नीति प्रति लक्षित गर्दै ओलीले प्रत्यक्ष राष्ट्रपति शासनको विरोध गर्न नहुने बताए । उनले भने, ‘एमाले तानाशाहीको मात्र विरोध गर्छ, कुनै पनि लोकतान्त्रिक पद्दतिको विरोध गर्दैन, अमेरिकामा राष्ट्रपति शासन छ, त्यहाँ लोकतन्त्र छ, त्यसैले हामी अमेरिकाको विरोध गर्दैनौं ।
करिब आधा घन्टा घोषणापत्रको व्याख्यामा बिताएका ओलीले वाम गठबन्धनको जितले स्थायी सरकार आउने र विकासको लहर आउने प्रतिबद्धता जनाए ।
ओलीभन्दा पहिले बोल्दै माओवादी केन्द्रका अध्यक्ष प्रचण्डले घोषणपत्र केही ढिला भएको उल्लेख गर्दै घोषणापत्र दुई विषयमा केन्द्रित रहेको बताए । उनले भने, ‘घोषणापत्र तयारीका क्रममा केही ढिला भएको हो, हाम्रो घोषणापत्रमा राजनीतिक स्थायित्व र आर्थिक संवृद्धिमा केन्द्रित छ ।’
एमाले र माओवादीको मिलने ७० वर्षदेखिको राजनीतिक भुमरीको अन्त्य हुने प्रचण्डको दाबी थियो । प्रचण्डले घोषणापत्रको मुख्य बुँदाहरुबारे मात्र चर्चा गर्दै विचार मिल्ने शक्तिहरु वाम गठबन्धनमा अझै आउन सक्ने बताए ।
४८ पृष्ठ लामो घोषणापत्रमा ८ विभिन्न शीर्षक उल्लेख गरिएको घोषणापत्रमा लोकतन्त्रको रक्षा, वामपन्थी तालमेलको आवश्यकता, शान्ति, समतना, स्वच्छ निर्वाचन, सामाजिक आर्थिक रुपान्तरणका नीति, समृद्धिका कार्यक्रम, अन्य राजनीतिक पार्टीप्रतिको धारण अदिलाई महत्वका साथ प्रस्तुत गरिएको छ ।
