सन् २०१० को विश्वविजेता स्पेनलाई पेनाल्टीसुटआउटमा ४-३ ले पराजित गर्दै आयोजक रसिया विश्वकपको क्वाटरफाइनलमा पुगेको छ ।
घरेलु मैदानमा निर्धारित ९० मिनेट र अतिरिक्त ३० मिनेटको समय १-१ को बराबरीमा रोकिएपछि पेनाल्टीसुटआउटबाट खेलको निर्णय भएको हो । जहाँ स्पेनका कोके र इयागो असपास गोल गर्न असफल भए । दुवैको पेनाल्टी प्रहार रसियाका गोलकिपर अकिनफिभले बचाए। आसपासको पेनाल्टी गोलकिपर अकिनफिभले ढलिसकेका बेला खुट्टाले छेकेर बचाएका थिए ।
रसियाका लागि स्मोलोभ, इग्नासोभिक चेरिसेभ र गोलोभिनले गोल गरे। स्पेनका इनेष्टा, पिके र रामोसले मात्र गोल गरे ।
रसियाले अब क्वाटरफाइनलमा क्रोएसिया र डेनमार्कबीचको खेलको विजेतासँग प्रतिस्पर्धा गर्नेछ ।
मस्कोस्थित लुजनिकी स्टेडियममा रसियाका सर्गेई इग्नासेभिचले आफ्नै पोस्टमा गोल गरेपछि स्पेनले १२औँ मिनेटमै घरेलु टोली विरुद्ध अग्रता बनाएको थियो ।
तर रसियाले पहिले हाफमै बराबरी गोल फर्कायो। ४१औँ मिनेटमा अर्टेम ज्युबाले पेनाल्टीमा गोल गर्दै खेल बराबरी गरे ।
निर्धारित ९० मिनेटको खेल १-१ को बराबरीमा सकिएपछि ३० मिनेटको अतिरिक्त समय थपिएको हो ।
निर्धारित समयमा स्पेनले बारम्वार आक्रमण गरेपनि गोल गर्न भने सकेन ।
खेल अतिरिक्त समयमा गएपछि विश्वकप फुटबलको इतिहासमै पहिलो पटक फोर्थ सब्स्टिच्युसनको प्रयोग पनि यही खेलमा भयो । फिफाको नयाँ ल अफ गेम अनुसार अतिरिक्त समयमा खेल पुगेको खण्डमा चौथो वैकल्पिक खेलाडी प्रयोग गर्न पाउनेछ ।
९७औँ मिनेटमा डालेभ कुज्याभको स्थानमा रसियाले अलेक्जान्डर येरोदखिनलाई मैदान उतार्दै चौथो वैकल्पिक खेलाडी खेलायो । यस्तै स्पेनले पनि १०४औँ मनेटमा मार्को असेन्सिओको स्थानमा रोड्रिगोलाई चौथो वैकल्पिक खेलाडीको रुपमा खेलायो ।
