अमेरिकामा रहेका नेपाली सञ्चारकर्मीहरुको साझा संस्था नेपाल अमेरिका पत्रकार संघ (नेजा) ले प्रत्येक दुई वर्षमा प्रदान गर्दै आएको नेजा ग्रामीण उत्कृष्ट पत्रकारिता पुरस्कारका लागि दरखास्त आह्वान गरिएको छ ।
नेपाल पत्रकार महासंघ केन्द्रीय कार्यालय सिनामंगलमा २०७६ साल चैत ७ गतेभित्र दरखास्त दिन आह्वान गरिएको हो । नेपाल पत्रकार महासंघले यही फागुन १८ गते निकालेको सूचनाअनुसार आवेदन फारम fnjnepal.org मा गएर डाउनलोड गर्न सकिनेछ ।
पुरस्कारका लागि आवेदन दिन इच्छुक पत्रकारले २०७५ साल जेठ १ गतेदेखि २०७६ फागुन ३० गतेसम्ममा प्रकाशन/प्रशारण भएका कम्तीमा तीनवटा सामग्री महासंघको इमेल fnjnepalcentral@gmail.com मार्फत वा सञ्चारग्रामस्थित केन्द्रीय कार्यालयमा उपलब्ध गराउनु पर्ने छ ।
उक्त पुरस्कार नेपालको ग्रामीण भेगमा रहेर आर्थिक, सामाजिक, सांस्कृतिक, विकास र सुशासनका क्षेत्रमा सुधार ल्याउन र जनचेतना अभिवृद्धिका लागि महत्वपूर्ण भूमिका निर्वाह गर्दै आएका सञ्चारकर्मी वा सञ्चार संस्थालाई प्रदान गरिन्छ ।
पुरस्कारको राशि २,२२,२२२.२२ (दुई लाख बाइस हजार दुई सय बाइस रुपैयाँ, बाईस पैसा) रहेको छ ।
