१३ फाल्गुन २०८०, आइतबार | Mon Feb 26 2024

धरौटी बुझाउन नसकेपछि भूटानी शरणार्थी नेता टेकनाथ रिजाल थुनामै



आवश्यक धरौटी रकम बुझाउन नसकेपछि नक्कली भुटानी शरणार्थी काण्डका आरोपी भुटानी शरणार्थी नेता टेकनाथ रिजाल जेलमै रहेका छन् । उच्च अदालत पाटनले १५ लाख रुपैयाँ धरौटीमा छाड्न आदेश दिए पनि उनी छुट्न सकेका छैनन् ।

मंसिर १५ गते अदालतले रिजालसहित ७ जनालाई धरौटीमा छाड्न आदेश दिएको थियो । तीमध्ये धरौटी बुझाएर ६ जना छुटिसकेका छन् । उच्च अदालत पाटनका न्यायाधीशहरू जनक पाण्डे र प्रकाश खरेलको इजलासले रिजाललाई १५ लाख रुपैयाँ धरौटी बुझाउन आदेश दिएका थिए । तर धरौटी बुझाउन नसकेपछि बिहीबारसम्म रिजाल थुनामै छन् ।

कोही आफन्तले धरौटी रकमको जोहो गरिदिए आफू थुनामुक्त हुने उनले बताए पनि अझै जोहो हुन नसकेको बताइएको छ ।

टेकनाथलाई भेट्न उनकी श्रीमती कारागार गइरहन्छिन् । कहिलेकाहीँ आफन्त र साथीहरू पनि जाने गर्छन् । रिजाललाई सुरूमा अन्य अभियुक्तहरूसँगै राखिएको थियो । तर उनले आफू अरू कैदीबन्दीसँग बस्दिनँ भनेपछि बेग्लै ठाउँमा बस्ने व्यवस्था गरिएको छ ।

उनीसँगै थुनामा परेका हरिभक्त महर्जनले १५ लाख, हज समितिका अध्यक्ष शमशेर मियाँले १० लाख, पूर्वगृहमन्त्री बालकृष्ण खाणका स्वकीय सचिव नरेन्द्र केसीले १० लाख, रामशरण केसीले १५ लाख बुझाएर छुटिसकेका छन् ।

साथै पूर्वउपप्रधानमन्त्री टोपबहादुर रायमाझीका छोरा सन्दीपले बुधबार ३० लाख रुपैयाँ धरौटी बुझाएर कारागारबाट थुनामुक्त भए । साधारण तारेखमा रहेका आशिष बुढाथोकी पनि छुटिसकेका छन् ।

कारागारभित्र नेकपा (एमाले) का नेतासमेत रहेका पूर्व उपप्रधानमन्त्री टोपबहादुर रायमाझी र पूर्वगृहमन्त्रीसमेत रहेका नेपाली कांग्रेसका केन्द्रीय सदस्य बालकृष्ण खाण छन् । खाणका विषयमा न्यायाधीशहरूबीच राय बाझिएको थियो । पूर्वसचिव टेकनारायण पाण्डे, पूर्व गृहमन्त्रीका सल्लाहकार इन्द्रजित राई, सागर राई, गोविन्दकुमार चौधरी र आङटावा शेर्पा पनि थुनामै छन् ।

सानु भण्डारी, केशव दुलाल र सन्देश शर्मालाई भने ललितपुरको नख्खुस्थित कारागारमा सरूवा गरिएको छ । जिल्ला अदालत काठमाडौंले धरौटी मागेका लक्ष्मी महर्जन, टंक गुरूङ र केशव तुलाधरलाई उच्च अदालतले साधारण तारेखमा राखेको छ ।

प्रकाशित मिति : २१ मंसिर २०८०, बिहिबार  ६ : २४ बजे