चितवनको रत्नगर नगरपालिका–१० स्थित शिशु निकेतन माविको छात्राबासमा झुण्डिएको अवस्थामा भेटिएकी १४ वर्षीया शालिन पोखरेलको ‘झुण्डिएको कारण’ मृत्यु भएको पोष्टमार्टम रिपोर्टले देखाएको छ ।
त्रिवि शिक्षण अस्पताल, महाराजगञ्जमा गरिएको पोष्टमार्टम जाँचको प्रतिवेदन चिकित्सकहरुले आइतबार तयार गरेका छन् । त्यसमा उनको झुण्डिएका कारण मृत्यु भएको उल्लेख रहेको प्रहरीले जनाएको छ ।
उनकी बाबुलगायत आफन्तले बलात्कारको आशंका गरेकाले चिकित्सहरुले शालिनको संवेदनशील अंगको पनि जाँच गरेका थिए । तर, पोष्टमार्टम जाँचमा शंकास्पद विषय नदेखिएको बताइएको छ ।
स्काउटको डोरीमा होस्टलको कोठाभित्र झुण्डिएको अवस्थामा १२ फागुनमा उनको शव भेटिएको थियो । लगत्तै काठमाडौंबाट उनका बुबालाई बोलाएर प्रहरीले मुचुल्का गरेको थियो । तर, परिवारले शंका गर्दै गम्भीर छानबिनको माग गरेको थियो । प्रधानमन्त्री पुष्पकमल दाहाल प्रचण्डले पनि घटनाबारे गम्भीर छानबिन गर्न प्रहरीलाई निर्देशन दिएको भन्दै शनिबार स्ट्याटस लेखेका थिए ।
बाबुको भनाईलाई उदृत गर्दै विभिन्न मिडिया र सामाजिक सञ्जालमा बलात्कारपछि हत्या गरिएको आशंकासहितको विषयहरु आएपछि प्रहरीले सत्यतथ्यविना हल्लालाई नपत्याउन अपील समेत गर्नु परेको थियो ।
साथै विभिन्न राजनीतिक दल तथा नेताहरुले समेत गहिरो छानविनको माग गरेका थिए । आइतबार संसदीय समितिले समेत सरकारलाई छानविनको लागि निर्देशन दिएको थियो ।
प्रहरीले भने पोष्टमार्टम रिपोर्टको नतिजा र घट्नाका बेला भेटिएको सुसाइट नोटको आधारमा आत्महत्याको संभावना बढी रहेको बताएका छन् ।
