साइबर क्राइमको आरोपमा पक्राउ परेका विवादस्पद मेडिकल व्यवसायी दुर्गा प्रसाईंलाई थप पाँच दिन थुनामै राखेर अनुसन्धान गर्न जिल्ला अदालत काठमाडौंले अनुमति दिएको छ ।
उनलाई मंगलबार प्रधानमन्त्री केपी ओलीलाई भ्रष्टाचारीको आरोप लगाएर प्रमाण भन्दै केही कागजपत्रहरु प्रशारणमा ल्याएपछि पक्राउ गरिएको थियो । उनले ओलीको कम्बोडियाको एक टेलिकममा लगानी रहेको भन्दै केही कागजहरु सार्वजनिक गरेका थिए । ३२ अर्व नेपाली रुपैयाँ रहेको भनिएको ती कागजहरु किर्ते जस्तो देखिएको र साइवर क्राइममा थप अनुसन्धान गर्नु पर्ने भन्दै प्रसाइलाई पक्राउ गरिएको हो ।
उनलाई म्याद थपका लागि बुधबार जिल्ला अदालत काठमाडौँ पुर्याइएको थियो । न्यायाधीश माधव प्रसाद अधिकारीको इजलासले ५ दिन हिरासतमै राखेर अनुसन्धान गर्न प्रहरीलाई अनुमति दिएको हो ।
प्रहरीले उनलाई साइवर क्राइमका साथै किर्ते, संगठित अपराध तथा सम्पति शुद्धिकरणलगायतका विषयमा पनि अनुसन्धान थाल्ने जनाएको छ । यसअघि पनि उनी साइबर क्राइमकै आरोपमा असोज ६ गते पक्राउ परेर एक लाख रुपैयाँ धरौटीमा रिहा भएका थिए । उनी बिरुद्ध त्यस बेला राष्ट्रिय स्वतन्त्र पार्टीकी एक केन्द्रीय सदस्यले साइबर क्राइममा उजुरी हालेकी थिइन् ।
