अमेरिकाका राष्ट्रपति निर्वाचित डोनाल्ड ट्रम्पले संघीय शिक्षा विभागलाई “विघटन” गर्ने योजना अघि सारेपछि तरंग पैदा भएको छ ।
यसले कस्तो असर पर्ला र उनी के चाहन्छन् भन्ने कुराको अनुमान लगाउन थालिएको छ । एपीका अनुसार उनले आफ्नो चुनावी अभियानका बेला शिक्षा विभाग “उग्रवादी, अतिवादी र मार्क्सवादीहरू” बाट भरिएको आरोप लगाएका थिए ।
ट्रम्पले त्यही विभागको नेतृत्व पूर्व रेसलिङ कार्यकारी लिण्डा म्याकमाहोनलाई चयन गरेका छन् । संघीय शिक्षा विभागको मुख्य भूमिका आर्थिक रहेको छ । यसले प्रत्येक वर्ष कलेज र विद्यालयहरूलाई अर्बौं डलर वितरण गर्दछ र संघीय विद्यार्थी ऋण व्यवस्थापन गर्दछ । विभाग बन्द गरियो भने यसको कामहरू अन्य संघीय निकायहरूमा हस्तान्तरण गर्नुपर्ने विज्ञहरुले बताएका छन् ।
शिक्षा विभागले हरेक वर्ष १.५ ट्रिलियन डलरभन्दा बढी विद्यार्थी ऋण व्यवस्थापन गर्छ भने यसको ४० मिलियनभन्दा बढी विद्यार्थी ऋणहरेका छन् । यसका अतिरिक्त विभागले कम आय भएका विद्यार्थीहरूलाई उपलब्ध गराइने पेल ग्रान्ट र एफएएफएसए कार्यक्रमको पनि व्यवस्थापन गर्छ ।
राष्ट्रपति जो बाइडेन प्रशासनले विद्यार्थी ऋण माफीलाई प्राथमिकतामा राखेकोमा ट्रम्पले त्यसको विरोध गर्दै “अवैध र अन्यायपूर्ण” भनेर आलोचना गरेका छन् । यद्यपी उनले विद्यार्थी ऋण व्यवस्थापनमा के कस्तो परिवर्तन गर्ने छन् भन्ने कुरा स्पष्ट छैन ।
त्यसैगरी शिक्षा विभागले नागरिक अधिकार कार्यालयमार्फत विद्यार्थीहरूको अधिकार संरक्षणमा महत्त्वपूर्ण भूमिका खेल्दै आएको छ । ट्रम्पले आफ्नो अभियानमा “जातीय आधारमा भेदभाव रोक्न” नागरिक अधिकारका मुद्दामा ध्यान केन्द्रित गर्ने बताएका थिए । उनले विविधता र समानताको नीतिहरूलाई “अवैध भेदभाव” का रूपमा व्याख्या गर्दै आएका छन् । साथै उनले समलिङ्गी र ट्रान्सजेन्डर विद्यार्थीहरूलाई प्राप्त संरक्षण हटाउने जनाइसकेका छन् ।
शिक्षण संस्थाहरूको मान्यताको व्यवस्थापनमा पनि ट्रम्पले परिवर्तनको योजना अघि सारेका छन् । उनले “वामपन्थी मान्यताकर्ताहरूलाई हटाउने” र “अमेरिकी परम्पराको संरक्षण” गर्ने नयाँ मान्यताकर्ता चयन गर्ने बताएका छन् । चुनावी अभियानका क्रममा ट्रम्पले संघीय स्तरको शिक्षा सहायता कार्यक्रमहरूलाई राज्यहरूमा स्थानान्तरण गर्ने कुरा गरेका थिए । यसले शिक्षामा संघीय नियमनको समाप्ति र राज्यहरूको भूमिकामा वृद्धि गर्ने ट्रम्पको दृष्टिकोणलाई झल्काउँछ ।
यद्यपी शिक्षा विभागको विघटन र नीतिगत परिवर्तनका लागि कानूनहरु संशोधन गर्नु पर्ने हुन्छ । संघीय सहयोग घटेमा कम आय भएका विद्यार्थी र संस्थाहरूलाई गम्भीर प्रभाव पर्ने सम्भावना छ । ट्रम्पको शिक्षा नीति अमेरिकाको शिक्षा प्रणालीको भविष्यमा ठूलो प्रभाव पार्न सक्ने विश्लेषकहरूले अनुमान लगाएका छन् ।
