अमेरिकाका नव-निर्वाचित राष्ट्रपति डोनाल्ड ट्रम्पले आइतबार आफ्नो प्रशासनले पनामा नहर फिर्ता लिने प्रयास गर्न सक्ने संकेत गरेका छन् । उनले अमेरिकाले यो नहर “मूर्खतापूर्वक” पनामालाई सुम्पेको भन्दै त्यस्तो बताएका हुन् ।
ट्रम्पले एरिजोनाको फिनिक्समा आयोजित “अमेरिकाफस्ट” कार्यक्रममा यसो भनेका हुन् । उनले पनामा नहरमा व्यापारिक जहाजहरूलाई पार गर्न “अत्यधिक शुल्क” लिने गरिएको आरोप समेत लगाए ।
यसमा पनामा राष्ट्रपति जोसे राउल मुलिनोले ट्रम्पको प्रस्तावलाई आफ्नो देशको सार्वभौमसत्तामाथिको अपमान भनेका छन् । उनले ट्रम्पलाई प्रतिवाद गर्दै “पनामा नहर हाम्रो हो र सधैं पनामाकै हुनेछ” भनी कडा प्रतिक्रिया दिएका छन् ।
पनामा नहर अमेरिकाले १९९९ मा पनामालाई हस्तान्तरण गरेको थियो । नहर पनामा सरकारको वार्षिक आम्दानीको करिब पाँचौं हिस्सा उत्पन्न गर्छ । ट्रम्पले भने, “हामी पनामा नहरको सम्पूर्ण स्वामित्व फिर्ता चाहन्छौं । यो हाम्रो नैतिक र कानुनी अधिकार हो ।”
पनामा सरकारले भने शुल्क वृद्धि सञ्चालन लागत र मागका आधारमा निर्धारण गरिएको बताउँदै ट्रम्पको आरोप अस्वीकार गरेको छ ।
यो विवाद ट्रम्पको भाषणसँगै सामाजिक सञ्जालमा थप तातेको छ । उनले अमेरिकी झण्डासहित “युनाइटेड स्टेट्स क्यानाल” लेखिएको तस्वीर पोस्ट गरेका छन् । ट्रम्पको यो प्रस्तावले अमेरिका र पनामा सम्बन्धमा नयाँ चुनौती थप्ने संकेत देखिएको छ ।
