फ्लोरिडा तटमा स्पेसएक्स क्याप्सुलको सफल अवतरणसँगै नौ महिनासम्म अन्तर्राष्ट्रिय अन्तरिक्ष केन्द्र (आइएसएस) मा रहेका नासाका अन्तरिक्षयात्रीहरू बुट्च विलमोर र सुनी विलियम्स सुरक्षित रूपमा पृथ्वीमा फर्किएका छन् ।
क्याप्सुल पृथ्वीको वायुमण्डलबाट पछि चारवटा प्यारासुटहरूले यसलाई समुद्रमा अवतरण गराएका थिए । रोचक दृश्यका रूपमा, डल्फिनहरूको एउटा समूह क्याप्सुल वरपर घुमिरहेको देखिन्थ्यो ।
बचाव टोलीले क्याप्सुललाई पानीबाट निकालेर डेकमा राखेपछि, अन्तरिक्षयात्रीहरू बुट्च, सुनी, नासा अन्तरिक्षयात्री निक हेग र रूसी अन्तरिक्षयात्री अलेक्जान्दर गोर्बुनोभ बाहिर निकालिएका थिए । उनीहरूलाई जहाजमा स्वागत गरियो र स्वास्थ्य परीक्षणका लागि लगियो ।
नासाको योजना अनुसार बुट्च र सुनीको मिशन केवल आठ दिनको हुने थियो । तर, जुन २०२४ मा बोइङको स्टारलाइनर अन्तरिक्षयानमा आएको प्रविधिगत समस्याका कारण उनीहरूको फर्कने योजना अनिश्चित बन्यो । स्टारलाइनर खाली अवस्थामा सेप्टेम्बरमा फर्काइएपछि नासाले उनीहरूको स्वदेश फिर्तीका लागि अर्को विकल्प खोज्नु पर्यो ।
सेप्टेम्बरको अन्त्यमा आइपुगेको स्पेसएक्स क्याप्सुलमा दुईजना थप यात्रुका लागि सिट खाली रहेकाले बुट्च र सुनीको यात्रा तय गरियो । यसै क्रममा उनीहरूले अन्तरिक्षमा विभिन्न वैज्ञानिक अनुसन्धान, बाहिरी मरम्मत तथा अन्य गतिविधिहरू गरे । सुनी विलियम्सले महिला अन्तरिक्षयात्रीमध्ये सबैभन्दा धेरै समय स्पेसवाक गरेको नयाँ कीर्तिमान पनि बनाइन् ।
१७ घण्टाको यात्रापछि पृथ्वीमा फर्किएका अन्तरिक्षयात्रीहरूलाई अहिले चिकित्सा परीक्षणका लागि ह्युस्टनको जोनसन स्पेस सेन्टर लगिएको छ । लामो समयको भारहीन अवस्थाले हड्डीको घनत्व घटाउने, मांशपेशी कमजोर पार्ने, रक्तसञ्चारमा असर गर्ने र दृष्टिमा समस्या ल्याउन सक्ने भएकाले उनीहरूलाई विस्तृत स्वास्थ्य परीक्षण तथा पुनःसन्तुलन कार्यक्रम प्रदान गरिनेछ ।
ब्रिटिश अन्तरिक्षयात्री टिम पीकका अनुसार पृथ्वीमा फर्किएपछि केही दिन शारीरिक रूपमा निकै चुनौतीपूर्ण हुने बताउँदै भने, “अन्तरिक्षमा तौलविहीनताको अनुभव सुखद भए पनि पृथ्वीमा फर्किएपछि गुरुत्वाकर्षणको प्रभाव झेल्न निकै गाह्रो हुन्छ ।”
यता, सुनी विलियम्सले अन्तर्वार्तामा आफ्नो लामो यात्राबाट घर फर्किने कुरामा खुशी व्यक्त गर्दै भनिन्, “म परिवार, कुकुरहरू र समुद्रमा डुब्नका लागि निकै उत्साहित छु ।”
