ल्हाक्पा गेलु शेर्पा, न्युयोर्क
न्युयोर्कको क्विन्सस्थित तिब्बती कम्युनिटी हलमा गत अप्रिल १९, २०२५ मा पहिलो पटक आयोजित हिमाली नृत्य प्रतियोगिता भव्य रूपमा सम्पन्न भएको छ । Live to Love र Drukpa USA Inc. को सहकार्यमा सम्पन्न यस कार्यक्रमले हिमाली समुदायको सांस्कृतिक विविधता, युवा प्रतिभा, र समुदायबीचको एकतालाई उजागर गर्यो ।
कार्यक्रमको शुभारम्भ डिकी पाल्देनको स्वागत मन्तव्यबाट गरिएको थियो भने छोके ल्हामोले Live to Love संस्थाको उद्देश्य र करुणा, शिक्षा, महिला सशक्तिकरण, सेवा र वातावरण संरक्षण जस्ता गतिविधिहरू समेटिएको संक्षिप्त वृत्तचित्र प्रस्तुत गरेकी थिइन् ।
प्रतियोगितामा नेपाल, भुटान र तिब्बती समुदायका ११ समूहले सहभागिता जनाएका थिए । उनीहरूले आआफ्ना सांस्कृतिक नृत्य प्रस्तुत गर्दै परम्परागत पहिचान र हिमाली गौरवलाई जीवन्त रूपमा प्रस्तुत गरे । कार्यक्रम केवल नृत्य प्रतियोगिता मात्र नभई एक सांस्कृतिक उत्सवसमेत बन्यो, जसले युवाहरूलाई आफ्नो कला, भाषा, संस्कृति र पहिचानसँग गहिरो सम्बन्ध गाँस्ने अवसर प्रदान गर्यो ।
कार्यक्रममा धर्मगुरु ग्याल्वा दोखम्पा रिन्पोचेको विशेष उपस्थिति रहनुले थप ऊर्जा र गरिमा प्रदान गर्यो । अन्य विशिष्ट अतिथिहरूमध्ये नृत्य र बौद्ध धर्म सम्बन्धी लेखिका करेन ग्रीनस्पान, फिल्म निर्माता तथा पूर्व ब्यालरिना जोहना बेनेट र उद्यमी एवं Drukpa USA का मानार्थ अध्यक्ष दावा लोभाले हिमाली कला, संस्कृति र बुद्ध धर्मप्रतिको आफ्नो यात्राबारे विस्तृत अभिव्यक्ति दिएका थिए ।
बिभिन्न संघसंस्थाका प्रतिनिधि तथा दर्शकहरुको उल्लेख्य उपस्स्थिति रहेको उक्त प्रतियोगितामा नेपालका थुमाइस, सबित्री र मनिषा, तेन्जिङ इङ्सेल तथा मुस्ताङको लो-न्यासिप सांस्कृतिक समूहले श्याब्रु नृत्य प्रस्तुत गरेका थिए । तिब्बती पक्षबाट खाम्पा भुमो, NYTSC समूहले रेल्पा, यर्लुङ सुनो, र ग्याकी कोर्दो नृत्य प्रस्तुत गरे । भुटानबाट लजे र उर्गेन, डाकिनिस, खेन्चो पेल्देन र पेमा छोडेन समूहले भुटानी नृत्य प्रस्तुत गरेका थिए । प्रतियोगितामा जम्मा ११ समूहले भाग लिएका थिए ।
थुमाइस समूह (नेपाल) ले उत्कृष्ट प्रदर्शन गर्दै पहिलो स्थान प्राप्त गर्यो, NYTSC समूह (तिब्बत) दोस्रो, र डाकिनी समूह (भुटान) तेस्रो स्थानमा विजयी घोषित भए । विजेताहरूको छनोट निर्णायक मण्डलको ६० प्रतिशत निर्णय र उपस्थित दर्शकहरूको ४० प्रतिशत मतको संयोजनमा गरिएको थियो, जसले मूल्यांकन प्रक्रिया पारदर्शी र सहभागिमूलक बनायो ।
यो प्रतियोगिता नगद पुरस्कारको दृष्टिकोणले पनि उल्लेखनीय रह्यो । पहिलो स्थान प्राप्त समूहले US $3,888, दोस्रो स्थानले US $2,888 र तेस्रो स्थानले US $1,888 नगद पुरस्कार प्राप्त गरे । यो नगद राशी हालसम्मको प्रवासी हिमाली समुदायमा आयोजित सांस्कृतिक प्रतियोगितामध्ये सबैभन्दा ठूलो पुरस्कार राशी हो, जसले प्रतियोगिताको स्तर र महत्वलाई झन् उच्च बनायो ।
पहिलो स्थान विजेता थुमाइस समूहलाई धर्मगुरु ग्याल्वा दोखम्पा रिन्पोचेले पुरस्कार प्रदान गरे भने अन्य पुरस्कारहरू निर्णायकहरू तथा अतिथिहरूद्वारा वितरण गरियो ।
कार्यक्रमको समापन मन्तव्य टा छोडेनले दिँदै आयोजक, सहभागी, अतिथि र दर्शकहरूप्रति आभार प्रकट गरिन् । उनले प्रवासमा रहेका युवाहरूलाई आफ्नो संस्कार र पहिचानप्रति गर्व गर्न उत्प्रेरित गर्ने यस्ता कार्यक्रमहरूको महत्वमाथि प्रकाश पारिन् ।
यो कार्यक्रम नृत्यको माध्यमबाट हिमाली संस्कृति र समुदायलाई अन्तर्राष्ट्रिय मञ्चमा चिनाउने एउटा महत्वपूर्ण प्रयास बनेको छ । आयोजकहरूले भविष्यमा पनि यस्ता कार्यक्रमहरू निरन्तर आयोजना गर्ने प्रतिबद्धता व्यक्त गरेका छन् ।
