लागुऔषध नियन्त्रण ब्यूरो कोटेश्वरको टोलीले खैरो हेरोइन (ब्राउन सुगर) कारोबार गर्ने एक भारतीय गिरोहलाई काठमाडौंमा पक्राउ गरेको छ । पक्राउको क्रममा प्रहरी र लागुऔषध कारोबारीबीच झडप हुँदा दुई जना प्रहरी घाइते भएका छन् भने दुई भारतीय नागरिक प्रहरीको गोलीबाट घाइते भएका छन् ।
प्रहरीका अनुसार भारतबाट नेपाल प्रवेश गरेर काठमाडौं उपत्यकामा लागुऔषध कारोबार गर्दै आएको गिरोह झापाको काँकडभिट्टा नाकाबाट दुई दिनअघि नेपाल प्रवेश गरेको सूचना पाइएको थियो । सोही सूचनाको आधारमा ब्यूरोको टोलीले निगरानी थालेको थियो ।
इन्स्पेक्टर रोकश यादव र वरिष्ठ सई बालकृष्ण सञ्जेलको टोलीले मंगलबार दिउँसो करिब २ बजे काठमाडौं महानगरपालिका–११, सुन्धाराबाट भारतको पठाना दानापुर घर भएका २० वर्षीय सुमित कुमार र २५ वर्षीय चन्दन कुमार जैसवाललाई पक्राउ गरेको थियो । प्रारम्भिक रूपमा उनीहरूको साथमा लागुऔषध नभेटिए पनि सोधपुछपछि प्रहरीले थप अनुसन्धान अघि बढाएको थियो ।
प्रहरीले प्राप्त सूचनाका आधारमा टोखा नगरपालिका–३ स्थित ग्राण्डी अस्पतालको पछाडि भागेका गिरोहका अन्य सदस्यहरूलाई पक्राउ गर्न खोज्दा उनीहरूले प्रतिकार गरेका थिए । प्रहरीका अनुसार उनीहरूले रड प्रहार गरेर भाग्ने प्रयास गरेपछि नियन्त्रणमा लिन चार राउण्ड हवाइ फायर र त्यसपछि गोली चलाउनु परेको थियो ।
गोली लागेर घाइते हुनेमा पश्चिम बंगाल इस्लामपुर–११ का ४० वर्षीय सशिक आलम र बिहार गुञ्जियारका २२ वर्षीय मोहमद मन्जुर आलम छन् । सशिकको बाँया खुट्टाको घुँडामुनि एक राउण्ड र मन्जुरको बाँया घुँडामुनि दुई राउण्ड गोली लागेको हो । दुवैको अवस्था खतरामुक्त रहेको प्रहरीले जनाएको छ ।
घाइते भएका उनीहरूलाई प्रहरी अस्पताल महाराजगञ्ज प्राथमिक उपचार पछि राष्ट्रिय ट्रमा सेन्टरमा उपचार भइरहेको छ ।
शरीर खानतलासी गर्दा केही नभेटिए पनि उनीहरूसँग रहेको वूफर (गित सुन्ने उपकरण) खोलेर हेर्दा त्यसभित्र करिब २०० ग्राम खैरो हेरोइन लुकाइएको फेला परेको ब्यूरोका एसएसपी कृष्ण कोइरालाले जानकारी दिए । यो परिमाण लागू औषध नियन्त्रण ऐन, २०३३ अनुसार गम्भीर अपराधमा पर्छ । यस्तो कारोबारमा १५ वर्षदेखि जन्मकैदसम्मको सजाय र पाँचदेखि २५ लाख रुपैयाँसम्म जरिवाना हुनसक्ने व्यवस्था छ ।
पक्राउ परेका सशिक आलम यसअघि पनि लागू औषध कारोबारमा पक्राउ परेका थिए र धरौटीमा छुटेका थिए । अनुसन्धानमा खुल्न आएको विवरण अनुसार उनी यसपटक करिब ३०० ग्राम खैरो हेरोइनसहित नेपाल प्रवेश गरेका थिए, जसमध्ये केही बिक्री भइसकेको पाइएको छ ।
पक्राउ गर्ने क्रममा रड प्रहारबाट प्रहरी वरिष्ठ हवल्दार नवराज घिसिङ र सहायक हवल्दार रवीन्द्र केसी घाइते भएका छन् । घिसिङको बायाँ घुँडामा र केसीको दाहिने पाखुरामा चोट लागेको हो । दुवै जनाको उपचार नेपाल प्रहरी अस्पताल महाराजगञ्जमा भइरहेको छ, अवस्था सामान्य रहेको जनाइएको छ ।
