‘एक्स्ट्रिमिस्ट ग्रुप अफ नेपाल’ नामक समूहका अध्यक्ष दाबी गर्ने प्रकाश पाठकले १० जना उच्चपदस्थ व्यक्तिहरूलाई ज्यान मार्ने धम्की पठाएपछि नेपाल प्रहरीले व्यापक खोजी तथा अनुसन्धान अघि बढाएको छ ।
अख्तियार दुरूपयोग अनुसन्धान आयोगका प्रमुख आयुक्त प्रेमकुमार राई, तत्कालीन परराष्ट्र मन्त्री आरजु राणा, तत्कालीन गृहमन्त्री रमेश लेखक, बालकृष्ण खाणसहितका व्यक्तिहरूलाई इमेलमार्फत प्राप्त धम्कीपत्रपछि सुरक्षा निकाय सतर्क बनेको हो ।
धम्की पठाइएका इमेलमा प्रकाश पाठकको नाम स्पष्ट रूपमा उल्लेख छ । अख्तियार प्रमुख राईलाई पठाइएको पत्रमा “हाम्रो केन्द्रीय कमिटीले तपाईं सहित १० जना भ्रष्ट प्रशासक र अस्थिर सरकारका कारण सत्तामा आएकाहरूको हत्या गर्ने निर्णय गरेकोमा दुःखी छौं । १० दिनभित्र राजीनामा दिनुपर्छ, नभए मारिनुपर्नेछ” जस्ता अभिव्यक्ति समेटिएको छ ।
पत्रमा पाठकले भदौ २४ गते कारागारबाट फरार भएका कैदीबन्दीहरूलाई प्रयोग गरेर आक्रमण गरिने चेतावनीसमेत दिएका छन् । पत्र केही दिनअघि नै सम्बन्धित व्यक्तिहरूलाई पठाइएको थियो । घटना सार्वजनिक भएपछि नेपाल प्रहरीका विभिन्न युनिटले यसको स्रोत, सम्भावित जोखिम र पाठकको अवस्थाबारे अनुसन्धान अघि बढाएका छन् ।
अनुसन्धानमा संलग्न एक प्रहरी अधिकारीका अनुसार, धम्की इमेल पठाउने व्यक्तिको लोकेशन नेपालभित्र नभएको प्रारम्भिक संकेत मिलेपछि अन्तरदेशीय सूचना संकलन पनि भइरहेको छ । “विभिन्न युनिट अनुसन्धानमा छन् । इमेल पठाउने व्यक्ति नेपालमा भएको देखिंदैन,” ती अधिकारीले बताए ।
नेपाल प्रहरीको केन्द्रीय अनुसन्धान ब्युरो र अन्य इन्टेलिजेन्स निकायहरूले प्रकाश पाठक नामक व्यक्तिको पृष्ठभूमि, समूहको आकार र गतिविधिबारे छुट्टै ट्र्याकिङ थालेका छन् ।
यसैबीच पाठकले आफ्नो फेसबुक अकाउन्टमार्फत भिडियो सार्वजनिक गर्दै आफू ‘एक्स्ट्रिमिस्ट ग्रुप अफ नेपाल’ का अध्यक्ष भएको दाबी गरेका छन् । भिडियोमा उनले अख्तियार प्रमुख राईसहित १० जनाको हत्या गर्ने योजना बनाएको खुलेआम बताएका छन् । साथै प्रहरीले आफूलाई पछ्याइरहेको थाहा पाएको र आफ्ना “केटाहरू” पक्राउ परिरहेको दाबी पनि गरेका छन् ।
भिडियोमा पाठकले भनेका छन्, “प्रेम राईले प्रहरी प्रशासन दुरुपयोग गरेर धरपकड गरिरहेको छ । मैले सूची सार्वजनिक गरेको केही घण्टामै पाँच–सात जना पक्राउ भएको सुनेको छु । राजीनामा दिने सट्टा उल्टै दमन गरिरहेको छ । मेरो विचारमा उनको आयु लामो छैन, १० दिनअघि नै सक्काइदिन्छौं ।”
आफू भारतका विभिन्न स्थानमा लुकेर बसेको दाबी गर्दै उनले प्रहरी त्यहाँ–त्यहाँ पुगेको समेत बताएका छन् । “म एक घण्टामा चार ठाउँ परिवर्तन गरिरहेको छु । प्रहरीले समात्न खोजिरहेको छ, तर सक्दैन । प्रेम राईले आफ्नो ज्यानको सुरक्षा गर,” उनले धम्कीपूर्ण भाषामा भनेका छन् ।
नेपाल प्रहरी अहिले पत्रका स्रोत, भिडिओको प्रामाणिकता, संभावित जोखिम र पाठकको वास्तविक पहिचानबारे बहुपक्षीय अनुसन्धान गरिरहेको छ । सुरक्षा एजेन्सीहरूले यी धम्कीलाई ‘उच्च जोखिम’ का रूपमा लिएर निगरानी कडाइ गरेको बताइएको छ ।
