टिपिएस खारेज हुँदैमा आत्तिहाल्नु पर्दैन, यसरी बस्न सकिन्छ अमेरिका

May 4, 2018

कागजपत्र नभएका नेपालीलाई प्रदान गरिएको टेम्पोररी प्रोटेक्ड स्टाटस– टिपिएस सुविधा नथप्ने अमेरिकी सरकारको घोषणासँगै यतिखेर टिपिएस प्राप्त नेपालीहरू चिन्तित भएका छन् । टिपिएस पाएका नेपालीहरूले अब के गर्ने ? न्युयोर्कको पहिलो नेपाली मूलकी महिला कानुन व्यवसायी रहेकी चन्दा थापासँग हामीले यसबारेमा प्रश्न गरेका छौ । विगत एक दशकदेखि न्युयोर्कमै कानुन व्यवसायीको रूपमा सक्रिय रहेकी उनी ‘ल अफिस अफ चन्दा थापा’की सञ्चालिका हुन् । उनै थापासँग टिपिएस सुविधाको अन्त्य र नेपालीलाई पर्ने असरसम्बन्धी गरेको कुराकानीः

नेपाललाई टिपिएस नविकरण नगर्ने भएको छ, ९ हजार नेपालीलाई कस्तो असर पर्ला ?
कानुनी रूपमा काम गर्न पाइरहेको सुविधा जाने भएकोले असर त पर्ने नै भयो । टिपिएसको मिति सकिएको खण्डमा उहाँहरू गैरकानुनी ठहारिने छ । अब के गर्ने भन्ने चिन्ता बढ्नु स्वाभाविकै हो । अब यसबारेमा उहाँहरूले तुरुन्तै के गर्न सकिन्छ भन्ने बारेमा अर्को विकल्प खोज्नु जरुरी छ ।

त्यस्ता विकल्प के हुन सक्छन् ?
टिपिएस नवीकरण नहुने घोषणा गरे पनि एक वर्षसम्मको म्याद छ । अब थपेको म्याद पाउन पहिला जस्तै फाराम भरेर टिपिएसको वर्क परमिटको म्याद पनि बढाउन सकिन्छ । त्यसपछि कानुनी रूपमा बस्ने वैकल्पिक आधारहरू खोज्नु पर्छ ।

सरकारले जुन २४, २०१९ भित्र अमेरिका छाड्न भनेको छ, त्यसपछि पनि यहाँ बस्ने विकल्प छ त ?
विद्यार्थी छँदा छँदै टिपिएसमा गएको हो भने आफ्नो स्टाटस परिवर्तन गर्न सकिन्छ । त्यस्तै पहिला भिसा हुँदाहँुदै टिपिएस लिनेहरुले पनि आफ्नो स्टाटस परिवर्तन गर्न सकिन्छ । तर यतिखेर कोही मालिकले कामदारको रूपमा लेबर सर्टिफिकेट दिन अहिले तुरुन्तै प्रक्रिया थालेमा पनि ग्रिन कार्ड पाउन सकिन्छ ।

कस्ता व्यक्तिहरूले यस्ता थप सुविधा पाउन सक्छ ?
विशेषगरी सिक्स सर्किटमा पर्ने राज्यहरू केन्टकी, मिचिगन, ओहायो, टेनेसि त्यस्तै नाइन्थ सर्किटमा अलस्का, एरिजोना, क्यालिफोनिया, हवाई, आइदोह, मोन्टेना, नेभडा, ओरिगन र वासिङटन स्टेटमा बस्नेहरु जो कागज विना बाहिरबाट प्रवेश गरे पनि टिपिएस लिएको भए टिपिएस सकिन अगाडी नै कुनै आधार भए ग्रिनकार्ड बनाउन सकिने संभवना हुन्छ ।

टिपिएस र एसाइलम दुवै हुनेको हकमा के हुन्छ ?
टिपिएससँगै कसैको केस अदालतमा पुगेको छ र बन्द गरेको अवस्थामा पुन खुलाएर अघि बढ्न सकिन्छ । त्यस्तै टिपिएसमै छ र केस पनि चलिरहेको छ भने टिपिएस सके पनि त्यहीबाट जान सकिन्छ । जो असाइलम पनि नगरेको भिसा नभएको केस हारेर बसेकोलाई समास्या पर्न सक्छ उनीहरूले विकल्प खोज्नु पर्छ ।

यो अवधिमा नेपाल जान मिल्छ की मिल्दैन ?
अहिले तत्कालै केही फरक पर्दैन । तर यदि ढिला गरी गएमा फर्कँदा प्रश्न धेरै गर्न सक्छ र जोखिम हुन सक्छ । जोखिम पनि कति छ भन्ने कुरा त्यो व्यक्तिको केसमा निर्भर हुन्छ ।

अन्त्यमा, तपाईँको चिन्तामा रहेका व्यक्तिहरूलाई तपाईँको सुझाव के छ ?
टिपिएस नवीकरण नभएपनि एक वर्षसम्म अत्तिनु पदैन । एक वर्षभित्र के गर्ने भनेर कानुन व्यवसायीहरूसँग सल्लाह गर्र्नु जरुरी छ । टिपिएस आउने बेलामा अमेरिकी सरकारले नेपाली विद्याथीलाई डिएसओको अनुमति लिई पाउने पार्ट टाइम स्टुडेन्ट हुन मिल्ने सुविधा पनि आगामी जुन २४ ,२०१९ मा सकिदैछ । यदि सरकारले यो सुविधा निरन्तरता नदिएमा विद्यार्थीहरूले पुरानै नियम अनुसार फुलटाइम स्टुडेन्टको रूपमा रहनु पर्ने हुन्छ । यो कुरामा विशेष गरी विद्यार्थीहरूले ध्यान पु¥याउनु जरुरी छ ।

सम्बन्धित समाचार