गायक हेमनको सहयोगः देवीस्थान माविलाई १० थान कम्प्युटर

June 2, 2017

काठमाडौँ । साङ्गीतिक माध्यमबाट सामाजिक सेवामा समर्पित हुनुहुन्छ, गायक हेमन मोक्तान । उनले हेमन मोक्तान फाउन्डेशन मार्फत् अध्यारोबाट उज्यालोतिरको यात्रा शिक्षाका लागि साङ्गीतिक अभियान थालेका छन् ।
सोहि अभियान अन्तर्गत गायक हेमनले सिन्धुली जिल्लाको सुनकोशी गाउँपालिका– १ दुम्जास्थित देवीस्थान माध्यमिक विद्यालयमा १० थान कम्प्युटर हस्तान्तरण गरेका छन् । सो कम्प्युटर ल्याबको उद्घाटन एयुईस्थित नेपाली व्यवसायी तथा समाजसेवी उमेश कुमार न्यौपानेले शुभारम्भ गरे ।
गायक हेमनले भर्खरै युएईको एक महिने साङ्गीतिक अभियान सम्पन्न गर्नुभएको थियो । सोही अभियानमा सङ्कलित रकमबाट विद्यालयलाई कम्प्युटर सहयोग गरिएको गायक हेमनले जानकारी दिए ।


कार्यक्रममा दुवई बिजनेश काउन्सीलका उपसभापति उमेशकुमार न्यौपाने, मानव जीवन संरक्षण मञ्चका सचिव रिना शाही, हेमन मोक्तान फाउण्डेशनका अध्यक्ष हेमन मोक्तानले बालबालिकाको शिक्षाका लागि साङ्गीतिक अभियान गरी सहयोग जुटाउने अवसरका लागि सबैमा धन्यवाद दिएका थिए ।
उनीहरुले आगामी दिनमा पनि विद्यालयको शैक्षिक उन्नतिका लागि सहयोग जुटाउने प्रतिबद्धता ब्यक्त गरेका थिए ।
कार्यक्रममा विद्यालय व्यवस्थापन समितिका अध्यक्ष कौशल कोइरालाले शिक्षाको क्षेत्रमा सिन्धुलीमै नमूना विद्यालयको रुपमा देवीस्थानले सफलता प्राप्त गरिरहेको बताए । सो विद्यालयले १५ वर्षदेखि सिन्धुलीका साथै काभ्रे र रामेछाप जिल्लाका बालबालिकालाई अङ्ग्रेजी माध्यममा शिक्षा दिँदै आएको छ । इन्टरनेट सुविधासहितको कम्प्युटर शिक्षाले बालबालिकाको अध्ययनमा अझ सहयोग पुग्ने विश्वास अध्यक्ष कोइरालाको थियो ।
ब्यवस्थापन समितिका जेष्ठ सदस्य तीर्थबहादुर रायमाझीको सभापतित्वमा सम्पन्न कार्यक्रममा विद्यालयका प्रधानाध्यापक नारायण नेपालले कम्प्युटर दाताहरुलाई धन्यवाद दिँदै दाताहरुको सहयोग र साथले विद्यालयले गुणस्तरीय शिक्षा प्रदानमा सफलता प्राप्त गरेको बताए ।
कम्प्युटर ल्याव उद्घाटन कार्यक्रममा गायक हेमन मोक्तान र नारायण थापाले गीत प्रस्तुत गरेका थिए ।

सम्बन्धित समाचार