पारस शाहको ‘स्मी’ सार्वजनिक

September 22, 2018

काठमाडौँ स्थित सिसिआरसी कलेजका कक्षा बाह्रमा अध्ययनरत पारस शाहले लेखेको किशोर उपन्यास स्मी बजारमा आएको छ । सोही कलेजमा शुक्रवार एक कार्यक्रममा उक्त उपन्यास बिमोचन गरिएको हो ।

कलेजका प्रिन्सिपल हरिचन्द्र लामिछाने,कवि रमेश शुभेच्छुक,सूर्य बिसी,दिब्या बन्जाडे र लेखक पारस शाहले संयुक्त रुपमा पुस्तकको विमोचन गरे । प्रिन्सिपल लामिछानेले आफ्ना बिद्यार्थीले उपन्यासै लेख्नु आफ्ना लागि निकै हर्षको कुरा भएको बताए ।

साथै उनले लेखकको कलम निरन्तर चलिरहोस् भन्दै शुभकामना समेत ब्यक्त गरे । कवि रमेश शुभेच्छुकले उपन्यास किशोर अवस्थाका समस्या पहिचान र समाधानकालागि निकै नै उपयोगी रहेको धारणा राखेका थिए । त्यसैगरि लेखक शाहले पुस्तकको रचना गर्भबारे आफ्ना अनुभूति सुनाएका थिए ।

किशोर अवस्थाका बिद्यार्थीमा हुने पढाई र प्रेमबिचको द्धन्द्धमाथि उपन्यास केन्द्रित रहनुका साथै उपन्यासले अमर प्रेममा जोड दिएको सम्पादक सूर्य बिसीले जानकारी दिए ।

उपन्यासको आवरण तस्बीर सोही कलेजकै कक्षा बाह्रकी दिब्या बन्जाडेको रहेको छ । बिएन पुस्तक संसारले बजारमा ल्याएको १६० पृष्ठको सो पुस्तकको बजार मूल्य २७५ रुपैया रहेको छ ।

सम्बन्धित समाचार