शेर्पा भाषाको कार्यक्रम चलाउँदै सोनाम याङ्जी

September 16, 2017

एभरेस्ट टाइम्स/काठमाडौं

सोनाम याङजी शेर्पा ब्रिलियन्ट उच्च माविको कक्षा १२ मा पत्रकारिता पढ्दैछिन् । पढाइसँगै उनी इन्डिजिनियस टेलिभिजनबाट प्रसारण हुने शेर्पा भाषाको कार्यक्रम ‘शेर्वी ञ्येन्ठिन’को निर्माणमा र सञ्चालनमा व्यस्त हुन्छिन् । यो शेर्पा भाषाकै पहिलो टेलिभिजन कार्यक्रम हो ।
रेडियो चोमोलोङमामा शेर्पा भाषाकै कार्यक्रम प्रस्तोता बनेर पत्रकारिता सुरु गरेकी उनले रेडियो सिआइएएनमा पनि काम गरिन् । सोनाम याङ्जी भन्छिन्, ‘बुबाको सपना पूरा गर्न सन् २०१३ मा रेडियो चोमोलोङ्माबाट शेर्पा भाषाको कार्यक्रम प्रस्तोता भएँ । त्यसपछि सिआइएनमा काम गरें । पछि गोर्खापत्रमा शेर्पा भाषा समाचार सम्पादनको जिम्मेवारी पाएँ ।’

बुबाको सपना पुरा गर्ने क्रममा उनले समुदायको दायित्व थपिएकोले आफुले शेर्पा भाषाकै पहिलो टेलिभिजन कार्यक्रम निर्माण गरेको खुलाईन् । ‘बुबाको सपना छोरीले रेडियो र टेलिभिजनमा बोलेको हेर्नु र सुन्नु थियो,’ उनले भनिन्, ‘रेडियोमा काम गरेसँगै बुवाको सपना साकार पार्न पत्रकारिता विषय लिएर अध्ययन गर्न सुरु गरें ।’ उसो त आफु ६ बर्ष टेक्दै गर्दा बुवाको निधन भएपछि उनले दुःखका पापड बेल्नुप¥यो ।
सोलुखुम्बुको सोलु दुधकुण्डा नगरपालिका २ फेरामा पासाङ शेर्पा र पेम्मा डोमा शेर्पाको कोखबाट बिस २०५२ सालमा जन्मेकी थिइन् । नमो बुद्ध प्रबि फेराबाट पढाई सुरु गरेकी उनले गाउँकै जनजागृति उमाविबाट एसएलसी उतीर्ण गरिन् । त्यसपछि परिवारमा बुवाको भूमिका निभाउनु बाध्य भएसँगै पढाईलाई निरन्तरता दिन सकिनन् । परिवारको जिम्मेवारी र बहिनीको भविस्य आफ्नो काँधमा परेपछि उनले तीन बर्ष सम्म आफ्नो पढाईलाई थाँती राखेकी थिइन् ।


बुबाको सपना पूरा गर्न सन् २०१३ मा रेडियोमा काम सुरु गरेकी उनने रेडियो चोमोलोङमाबाट यात्रा अगाडि बढाइन् । रेडियोमा शेर्पा भाषाको कार्यक्रम प्रस्तोताको काम गरिन् । सिआईएन बाट पनि शेर्पा भाषाको कार्यक्रममा प्रस्तोताको रुपमा काम गरिन् । त्यसै गरी गोर्खापत्र राष्ट्रिय दैनिकबाट प्रकाशन हुने शेर्पा भाषा समाचार सम्पादनको भूमिका निर्वाह गरिन् । आफ्नो मातृभाषा प्रयोगमा कमी आएकोले सञ्चारमाध्यमबाट चेतना अभिवृद्धि गराउन आवश्यक रहेको उनी बताउँछिन् ।

सोनाम याङ्जीले चलचित्रमा पनि अभिनय गर्न भ्याएकी छिन् । शेर्पा भाषाको चलचित्र ‘टिन्छेन फमा’मा शेर्पा भाषामा निर्माण भएकै कारणले आफूल अभिनय गरेको उनले बताइन् । ‘टिन्छेन फमा’ आङ ङिमा शेर्पा कुङ्गाको निर्माण निर्देशनमा बनेको चलचित्र हो ।

विश्वले चिनिएका शेर्पा समुदायले आफ्नो भाषा, संस्कार, संस्कृति जगेर्ण गर्नु पर्ने उनको भनाई छ । यसरी नै भाषाको प्रयोगमा कमी हुने हो भने शेर्पा समुदाय नामले मात्रा शेर्पा रहने र शेर्पाको पहिचान नै संकटमा पर्न सक्ने कुराले उनी चिन्तित छिन् । शेर्पाहरु विश्वमा नाम र गिनिज वल्र्ड रेकर्डमा नाम राख्ने सँगै शेर्पा भाषाको संरक्षणमा पनि विचार दिनुपर्ने उनको भनाइ छ । यसरी शेर्पा भाषा, संस्कृति जोगउनु पर्छ भन्ने सोचले पत्रकारितामा लागेकी सोनाम याङ्जीको सपना पूरा होस र ऐतिहासिक कार्यक्रम शेर्वी ञ्येन्ठिनले निरन्तरता पओस, हाम्रो पनि शुभकामना ।

 

सम्बन्धित समाचार