न्युयोर्क । गैरआवासीय नेपाली संघ, अमेरिकाको निर्वाचन नजिकिँदा मतदाताका सूचनाहरु लिक हुन थालेपछि एनआरएन अमेरिकाका अध्यक्ष डा केशव पौडेलले यसमाथि छानबिन थालेको बताएका छन् ।
आज एक विज्ञप्ति जारी गर्दै अध्यक्ष पौडेलले गोपनीयताको व्यक्तिगत विवरण विधान विपरीत सार्वजनिक भएकोमा छानबिन प्रक्रिया शुरु भइसकेको उल्लेख गरे ।
उनले जारी गरेको विज्ञप्तिमा भनिएको छ, ‘साधारण सभाले प्रत्याभूति गरेको अधिकार, एनआरएनए अमेरिकाको आफ्नो विधानभन्दा बाहिर गएर सार्वजनिक भएको ‘गोपनीयताको व्यक्तिगत विवरण’ को छानबिनको प्रारम्भिक प्रक्रिया शुरु भइसकेको र यथाशक्य सार्वजनिक गरिने प्रतिबद्धता जाहेर गर्न चाहन्छु । पुनश्च: व्यक्तिगत विवरणको गोपनीयता चुहावटको अनुसन्धानका लागि प्राविधिक एवम कानुनी परामर्श शुरुवात भइसकेको जानकारी गराउँदछु तथा गोपनीयताका सूचना चुहावट गर्नेहरूमाथि अमेरिकी कानुन अनुसार सबै प्रकारका कारबाही हुने स्पष्ट पार्न चाहन्छु ।’
