पूर्वमा एक कार्यक्रममा सहभागी हुन जादै गरेका एमालेका जनजाति नेताहरु दुर्घट्नामा परेका छन् । पूर्वमन्त्री कृपाशुर शेर्पासहित नेता चढेको गाडी सिन्धुलीमा दुर्घटना हुँदा पाँच जना घाइते भएका छन् । जसमध्ये ३ को अवस्था गम्भीर रहेको बताइएको छ ।
जिल्ला प्रहरी कार्यालय सिन्धुलीका अनुसार काठमाडौंबाट प्रदेश १ को सुनसरीका लागि छुटेको बा २ च ९००३ नम्बरको ल्यान्ड क्रुजर मदन भण्डारी राजमार्ग खण्डमा सिन्धुलीको कमलामाई नगरपालिका वडा नम्बर १४ चन्दनपुरमा अनियन्त्रित भइ दुर्घटना भएको हो । गाडी दुर्घटनामा घाइतेमध्ये ४ जनालाई हेलिकप्टरमार्फत काठमाडौंको ट्रमा सेन्टर पठाइएको सिन्धुली प्रहरीका एसपी विमलराज कँडेलले जानकारी दिएका छन् ।
दुर्घटनामा एमाले पोलिटब्युरो सदस्य तथा आदिवासी जनजाति उत्थान राष्ट्रिय प्रतिष्ठानका उपाध्यक्ष गोकुल घर्ती, पूर्वमन्त्री शेर्पा, जनजाति महासंघको पूर्व महासचिव पेम्बा गुरुङ भोटे, नेता देवराज राई, गणेश थापा रहेका छन् । घाइतेमध्ये पेम्बा, देवराज र गणेशको अवस्था गम्भीर रहेको बताइएको छ ।
उनीहरु नेकपा (एमाले) निकट लोकतान्त्रिक आदिवासी जनजाति महासंघ प्रदेश नम्बर एकको विस्तारित बैठकमा जाने क्रममा दुर्घटना भएको हो । चालकलाई प्रहरीले नियन्त्रणमा लिएको छ ।
