मङ्लबार दिउँसो संघीय संसद् भवनअगाडि शरीरमा पेट्रोल छर्केर आत्मदाहको प्रयास गरेका इलामको सूर्योदय नगरपालिकाका ३७ वर्षीय प्रेमप्रसाद आचार्यको निधन भएको छ । उनको कीर्तिपुरस्थित बर्न अस्पतालमा उपचारका क्रममा आज बिहान निधन भएको हो ।
अस्पतालका चिकित्सक डा किरण नकर्मीका अनुसार आचार्यको शरीरको ८० प्रतिशत भाग जलेको थियो । जलेर गम्भीर घाइते भएका उनलाई प्रहरीले घटनास्थलबाट तत्कालै उपचारका लागि कीर्तिपुर अस्पताल पुर्याएको थियो ।
युवाहरुको प्रदर्शन
नयाँ बानेश्वरस्थित संसद भवनअघि मंगलबार आत्मदाह गरेर ज्यान गुमाएका प्रेमप्रसाद आचार्यको न्याय माग्दै युवाहरू सडकमा उत्रिएका छन् ।
काठमाडौंको माइतीघर मण्डलामा स्वतस्फुर्तरुपमा युवाहरु सडकमा उत्रिएका हुन् । उनीहरुले विभिन्न प्लेकार्डसहित प्रदर्शन गरेका छन् ।
लुटतन्त्र, भ्रष्टाचारविरुद्ध एकजुट हौं, भन्दै प्रदर्शनकारीले उनले उठाएका सवालहरूलाई पूरा गर्न पनि दबाब दिएका छन् ।
