सहकारीको माध्यमबाट बचतकर्ताको अर्बौ रकम ठगेकाहरु विदेशिएको आशंका प्रहरीले धमाधम रेडकर्नर नोटिस जारी गरेको छ । अन्तर्राष्ट्रिय प्रहरी संगठन मार्फत नोटिस जारी भएपछि आरोपी जुन सुकै देशमा रहेपनि सदस्य देशका प्रहरीले पक्राउ गरेर बुझाउने गर्दछ ।
सहकारी ठगीका आरोपी बाग्लुङका देवकुमार नेपाली र उनकी श्रीमतीको नाममा रेड कार्नर नोटिस जारी गराएको प्रहरीले लगतै सहकारीको रकम ग्यालेक्सी टिभिमा लागनी गरेर ठगेका जीबी राईको नाममा पनि रेककर्नर नोटिस जारी गरेको छ ।
त्यस्तै जीवी राईकै समुहले चलाएको सूर्यदर्शन सहकारीका थप दुई पदाधिकारीहरु अध्यक्ष थानबहादुर बुढामगर र पूर्वअध्यक्ष भुपेन्द्र राईविरुद्ध पनि इन्टरपोलमा डिफ्यूजन नोटिस जारी गरिएको छ ।
सहकारीको अर्बौं रकम अपचलन गरी फरार रहेका गितेन्द्रबाबु (जिबी) राईसहित तीन जनाविरूद्ध डिफ्युजन नोटिस जारी गरिएको हो । सूर्यदर्शन बचत तथा ऋण सहकारी संस्थाका अध्यक्ष जिबी राई, पूर्वअध्यक्षद्वय भूपेन्द्र राई र थानबहादुर बुढामगरविरूद्ध डिफ्युजन नोटिस जारी भएको प्रहरी प्रधान कार्यालयले जनाएको छ ।
जिल्ला प्रहरी कार्यालय कास्कीले पुस ५ गते उनीहरूविरूद्ध डिफ्युजन नोटिस जारी गर्न नेपाल प्रहरीको इन्टरपोल शाखाको अनुरोध गरेको थियो । उक्त अनुरोधपछि शुक्रबार तीन जनाविरूद्ध इन्टरपोल शाखाले नोटिस जारी भएको हो ।
फ्रान्सस्थित इन्टरपोल केन्द्रीय कार्यालयले कुनै पनि देशमा अपराध गरी विभिन्न देशमा भागेका अपराधीलाई पक्राउ गर्न विभिन्न प्रकारका नोटिसहरू जारी गरिन्छ । यसरी जारी गरेपछि इन्टरपोलमा सदस्य रहेका राष्ट्रले पनि अनुरोध अनुसार खोजी गर्छन् । यी विभिन्न प्रकारका नोटिस भए पनि जिबी राईसहित तीन जनाविरूद्ध भने डिफ्युजन नोटिस जारी भएको हो। डिफ्युजन नोटिस पनि कुनै अपराधीलाई पक्राउ गराउनको लागि जारी गरिने सूचना हो ।
सूर्यदर्शन सहकारी ठगी प्रकरणमा प्रहरीले जीबीसहित १९ जनालाई पक्राउ पुर्जी जारी गरेको थियो । तीमध्ये १५ जना फरार छन् । सूर्यदर्शनका पदाधिकारीले बचतकर्ताको १ अर्ब ११ करोड ३४ लाख ४३ हजार ४५ रुपैयाँ हिनामिना गरेको जाहेरीमा उल्लेख छ । उनीहरुलाई सहकारी ऐन अनुसार बिगो बराबरको जरिवाना र ८ देखि १० वर्ष कैद सजायको माग गरिएको छ ।
सूर्यदर्शनबाट जीबी राई समूहले नक्कली सेयर सदस्य र विभिन्न कम्पनी कडा गरेर पैसा निकालेर अपचलन गरेको प्रहरीले बुझाएको प्रतिवेदनमा उल्लेख छ ।
सहकारीका सञ्चालक तथा पदाधिकारीले कृत्रिम सेयर सदस्य र खाता खोलेर रकम अपचलन गरेको, सहकारीको नाममा कुनै पनि सम्पत्ति नराखी व्यक्तिको नाममा गरेको देखिएको प्रहरीको निष्कर्ष छ ।
