२६ माघ २०८१, शनिबार | Sat Feb 8 2025

एकीकृत समाजवादीले हटायो नेताको उमेर हद



सत्तारुढ नेकपा एकीकृत समाजवादीले पार्टी नेताहरूको उमेर हद हटाएको छ । अब नेताहरुले नमरुन्जेल नेतृत्व गर्न पाउने छन् ।

काठमाडौंमा सोमबार सकिएको दोस्रो केन्द्रीय परिषद् बैठकले यसअघि रहेको ७० वर्षे उमेर हदको प्रावधान हटाएको हो । यसअघिको व्यबस्था अनुसार ७० वर्षपछि नेताहरु कार्यकारी पदमा बस्न पाउने थिएनन् ।

उमेर अद हटेसँगै नेता झलनाथ खनालसहितलाई पार्टीको नेतृत्व लिन अब उमेर हदको तगारो हटेको छ । समाजवादीले यसअघि नै उमेर हद हटाउने गरी अघि बढाएको प्रस्तावलाई परिषद् बैठकले पारित गरेको हो ।

यस बैठकले केन्द्रदेखि तल्लो तहसम्मका कमिटीका पदाधिकारी र सदस्यहरू सबै प्रत्यक्ष निर्वाचित हुने व्यवस्थासहित विधान पनि संशोधन गरेको छ ।

समाजवादीले अब केन्द्रीय कमिटी १९९ जनाको हुने निर्णय पनि गरेकोछ । समाजवादीले केन्द्रीय पदाधिकारीको १९ सदस्यीय हुने पनि जानकारी दिएका छन् ।

समाजवादीले प्रदेश कमिटी ७५ देखि ९९ सदस्यीय बनाउने गरी विधानमा व्यवस्था गरेको छ । प्रदेश कमिटी पदाधिकारी ७ सदस्यीय हुने गरी विधानमा उल्लेख गरिएको छ ।

अब समाजवादीको जिल्ला कमिटी ५५ सदस्यीय हुने भएको छ । जिल्लाका पदाधिकारी पनि ७ जनाको कायम गरिएको छ ।

समाजवादीले १ भन्दा धेरै संघीय निर्वाचन क्षेत्र भएका जिल्लामा भने त्यो संख्या बढ्ने जनाएको छ । त्यस्ता जिल्लाका कमिटीमा महिलाको संख्या निर्वाचन क्षेत्र अनुसार ३ जनाले थपिने भुसालले बताए ।

प्रकाशित मिति : १५ माघ २०८०, सोमबार  ५ : ५७ बजे