अमेरिकी सरकारले उपलब्ध गराउने २०२६ का लागि डाइभर्सिटी भिसा (डिभी) कार्यक्रम लागि बुधबार साँझ (अक्टोबर २, २०२४) नेपाली समय अनुसार राति ९:४५ बजेदेखि आवेदन खुलेको छ । अमेरिकामा बसोबास गर्ने विदेशी नागरिकहरूको विविधतालाई प्रवर्द्धन गर्ने उद्देश्यले लक्षित यस कार्यक्रममा सहभागी हुन इच्छुक र योग्य देशका व्यक्तिहरूले अमेरिकामा स्थायी बसोबासको लागि आवेदन दिन सक्छन् ।
अमेरिकी दुतावासले बुधबार सामाजिक सञ्जाल फेसबुकमा एक जानकारी पोष्ट गर्दै योग्य आवेदकहरूले आफ्नो आवेदन आधिकारिक वेबसाइट dvprogram.state.gov मार्फत दर्ता गर्न सक्ने उल्लेख गरेको छ । आवेदन दिने समय बुधबार अक्टोबर २, २०२४ (नेपाली समय राति ९:४५ बजे) देखि नोभेम्बर ५, २०२४ (नेपाली समय राति १०:४५ बजे) सम्म रहेको छ । साथै एक व्यक्तिले एउटा मात्र आवेदन दिन पाउने र धेरै आवेदन दिँदा उक्त आवेदक छनौट प्रक्रियाबाट बाहिरिने उल्लेख गरिएको छ ।
डाइभर्सिटी भिसा कार्यक्रम सन् १९९० को अध्यागमन ऐनद्वारा स्थापना गरिएको थियो । यस कार्यक्रमको उद्देश्य अमेरिकामा कम मात्रामा आप्रवासी पठाउने देशका नागरिकहरूलाई त्यहाँ बसोबास गर्ने अवसर प्रदान गर्नु हो । हरेक वर्ष यस कार्यक्रम अन्तर्गत ५०,००० भिसाहरू उपलब्ध गरिन्छन् । छनौट प्रक्रिया पूर्णतः लक्की ड्र मार्फत हुन्छ । यस प्रक्रियामा सफल हुने आवेदकहरू अमेरिकाको स्थायी बासिन्दा बन्न सक्छन् ।
यस भिसा कार्यक्रम अन्तर्गत छनौट पूर्ण रुपमा लक्की ड्र मार्फत गरिन्छ। यसले गर्दा सहभागी हुने सबै देशहरूका लागि समान अवसर सुनिश्चित गरिन्छ । विगतका वर्षहरूमा यस कार्यक्रममा हरेक वर्ष करोडौं आवेदनहरू पर्ने गरेका छन् र हजारौं व्यक्तिहरू अमेरिकामा बसोबास गर्ने अवसर प्राप्त गर्न सफल भएका छन् ।
