अमेरिकी न्याय विभागले रिपब्लिकन पार्टीका उम्मेदबार पूर्व राष्ट्रपति डोनाल्ड ट्रम्पको चुनावी अभियानलाई सहयोग हुने गरी अर्वपति एलोन मस्कले मतदातालाई दश लाख डलर दिने घोषणामा प्रश्न उठाएको छ ।
मस्कको राजनीतिक एक्शन कमिटीलाई पत्र पठाउँदै उनले सुरु गरेको दश लाख डलर दिने योजना गैरकानूनी हुन सक्ने चेतावनी विभाषले दिएको हो । अमेरिकी सञ्चार माध्यमहरुका अनुसार यो योजना चिट्ठा शैलीमा अमेरिकाको केही स्विङ स्टेटहरुमा दर्ता भएका भोटरहरूलाई छानेर आफ्नो प्रतिबद्धतामा समर्थन जनाएबापत हरेक दिन दिने योजना हो ।
विश्वकै सबैभन्दा धनी व्यक्ति एलोन मस्क रिपब्लिकन ट्रम्पको राष्ट्रपति अभियानमा सक्रिय रूपमा सहभागी छन्, र यो कार्यक्रम पनि त्यही अभियानको हिस्सा हो । उनले अमेरिकी भोटरहरूलाई एउटा पिटिशनमा हस्ताक्षर गर्न प्रोत्साहित गर्दै पुरस्कार वितरण थालेका हुन् ।
मस्कको संगठन ‘अमेरिका पीएसी’ लाई न्याय विभागको पत्र कहिले पठाइएको हो भन्ने स्पष्ट पारिएको छैन । तर, अमेरिकी समाचारहरु अनुसार यो पत्र न्याय विभागको सार्वजनिक इमानदारी विभागबाट पठाइएको हो, जुन डेमोक्र्याटहरूको विरोधपछि पठाइएको बताइएको छ ।
अमेरिकी संघीय कानूनअनुसार, भोट गर्न दर्ता गराउनका लागि पैसा दिनु गैरकानूनी हो । तर, मस्कको यो योजना कानूनी रूपमा गलत हो कि होइन भन्ने अझै स्पष्ट छैन । मस्कले भनेको छन् कि यो योजना भोटरहरूलाई संविधानको पहिलो र दोस्रो संशोधनको समर्थनमा हस्ताक्षर गरेवापत दिने हो ।
यस योजनामा भाग लिन चाहनेले पिटिशनमा हस्ताक्षर गर्नुपर्ने र उनीहरूले कुनै पनि पार्टीको सदस्य हुन नपर्ने बताइएको छ । साथै, यो योजना सात निर्णायक राज्यहरूमा मात्र खुला गरिएको छ, जस्तै पेन्सिल्भेनिया, जर्जिया, नेवाडा, एरिजोना, मिशिगन, विस्कन्सिन, र नर्थ क्यारोलिना ।
केही कानूनी विशेषज्ञहरूले मस्कको यो योजना संघीय कानूनको उल्लंघन हुने सम्भावना रहेको बताएका छन् । अमेरिकी न्याय विभागले यस मामिलामा अनुसन्धान गरिरहेको छ, तर अहिलेसम्म आधिकारिक प्रतिक्रिया दिएको छैन ।
