जेफ बेजोसको अन्तरिक्ष कम्पनी ब्लु ओरिजिनले सोमबार अन्तरिक्ष पर्यटनको क्षेत्रमा अर्को कीर्तिमान स्थापित गरेको छ । कम्पनीले बेजोसकी मंगेतर लरेन सान्चेजलाई महिला सेलिब्रिटीहरूसँगै अन्तरिक्षमा पठायो ।
न्यू शेपर्ड नामक रकेटले पश्चिम टेक्ससबाट उडान भरेर पृथ्वीको सतहबाट करिब ६६ माइल (१०७ किलोमिटर) माथि अन्तरिक्षको किनारमा केही मिनेटको तौलहीनताको अनुभवसहित यात्रुहरूलाई लिएर सफल अवतरण गरेको छ ।
यो उडानले हाल बढ्दो अन्तरिक्ष पर्यटन प्रवृत्तिको प्रतिनिधित्व गर्छ, जहाँ पहिले पेशेवर अन्तरिक्ष यात्रीहरूमा मात्र सिमित अन्तरिक्ष यात्रा अहिले धनी, चर्चित र सञ्जाल भएका व्यक्तिहरूको पहुँचमा पुग्दैछ ।
हेलिकप्टर पाइलट तथा पूर्व टेलिभिजन पत्रकार सान्चेजले यस यात्राका लागि सेलिब्रिटीहरूसमेत समावेश रहेको टोलीलाई स्वयम् निमन्त्रणा गरेकी थिइन् । टोलीमा चर्चित गायिका केटी पेरी, “सीबीएस मोर्निङ” की सह-सञ्चालिका गेल किङ, चलचित्र निर्माता केरियन फ्लिन, पूर्व नासा इन्जिनियर तथा विज्ञान शिक्षा अभियन्ता आइशा बोवे, र वैज्ञानिक तथा लैंगिक हिंसा विरुद्धकी अभियन्ता अमाण्डा न्गुयेन रहेका थिए ।
१० मिनेट लामो पूर्णतः स्वचालित यस उडानमा सहभागी महिलाहरूले पृथ्वीको अद्भुत दृश्यहरू अवलोकन गरे । केटी पेरीले अन्तरिक्षमै “व्हाट ए वन्डरफुल वर्ल्ड” गीत गाएको जनाइएको छ ।
ब्लु ओरिजिनले यस यात्राको लागत वा खर्च कसले व्यहोर्यो भन्ने खुलाएको छैन । यो कम्पनीको ११औं मानवयुक्त अन्तरिक्ष यात्रा हो । जेफ बेजोस स्वयम् सन् २०२१ मा पहिलो अन्तरिक्ष पर्यटक उडानमा सहभागी भएका थिए र यस पछिल्लो मिसनमा पनि प्रक्षेपण स्थलमा उपस्थित थिए ।
विशेष कुरा के हो भने, यो संयुक्त राज्य अमेरिकाबाट पहिलो पटक महिलाहरूको मात्र टोली लिएर गरिएको अन्तरिक्ष यात्रा हो । इतिहासमा यसअघि एक जना मात्र महिला रहेको अन्तरिक्ष यात्रा भएको थियो, जुन ६४ वर्षअघि सन् १९६३ मा सोभियत अन्तरिक्ष यात्री भ्यालेन्टिना तेरेश्कोभाले पहिलो महिलाका रूपमा अन्तरिक्ष यात्रा गर्दा भएको थियो ।
आजसम्म अन्तरिक्ष पुगेका व्यक्तिहरूमा महिलाहरूको सहभागिता अझै पनि न्यून, करिब १५ प्रतिशत मात्र रहेको तथ्यांकले देखाउँछ । सान्चेजले सबै महिला टोलीसहित अन्तरिक्ष यात्रा गर्नेलाई स्वयम् रोजेको र यसले सबै उमेर समूहका व्यक्तिहरूलाई ठूला सपना देख्न र पूरा गर्न प्रेरणा दिने उद्देश्य रहेको बताएकी छन् ।
