राष्ट्रपति डोनाल्ड ट्रम्पले पुनः निर्वाचित भएको सय पुग्नै लाग्दा अमेरिकी जनताको धारणा तीव्र रुपमा नकारात्मक बनेको सीएनएन र एसएसआरएसले हालै गरेको सर्वेक्षणले देखाएको छ ।
हाल ट्रम्पको समग्र अनुमोदन दर ४१% मा झरेको छ उक्त सर्वेक्षणले जनाउको छ। जुन कम्तीमा सय दिनमै यो तहको न्यून अनुमोदन पाएको राष्ट्रपति ७० वर्षको अवधीमा सबैभन्दा कम हो । ट्रम्पको पहिलो कार्यकालको १०० दिनभन्दा पनि यो अनुमोदन दर कम हो । मार्चदेखि अनुमोदन दरमा ४ अङ्कले गिरावट आएको छ भने फेब्रुअरी अन्त्ययता ७ अङ्कले घटेको छ । अहिले मात्र २२% अमेरिकीहरूले ट्रम्पको नेतृत्वलाई “दृढतापूर्वक समर्थन” गरेका छन् । यो अहिलेसम्मकै न्यून बताइएको छ ।
प्रमुख जनसमूहहरूमा ट्रम्पप्रति समर्थनमा उल्लेखनीय गिरावट देखिएको छ । महिला र हिस्पानिक अमेरिकीहरूमा समर्थन ७ अङ्कले घटेर क्रमशः ३६% र २८% पुगेको छ । स्वतन्त्र (इन्डिपेन्डेन्ट) मतदाताहरूबीच ट्रम्पको समर्थन दर ३१% मा झरेको छ, जुन उनको पहिलो कार्यकालको सबैभन्दा तल्लो बिन्दु सँग मेल खान्छ ।
सर्वेक्षण अनुसार ट्रम्पले यसअवधीमा उठाएको लगभग सबै मुख्य विषयमा जनसमर्थन घट्दै गएको छ । अर्थतन्त्रको व्यवस्थापनमा उनको अनुमोदन दर मार्च यता तीव्र गतिमा घटेको छ । मूल्यवृद्धि र भन्सार नीतिको कारण शेयर बजारमा अस्थिरता देखिएपछि महङ्गीको मामलामा अनुमोदन दर ९ अङ्कले घटेर ३५% पुगेको छ भने अर्थतन्त्र सम्हाल्ने क्षमतामा विश्वास गर्नेहरू पनि १३ अङ्कले घटेका छन् ।
“म निराश छु । मैले उनलाई भोट दिएकी थिइनँ । तर अर्थतन्त्र सुधार्नेछन् भन्ने आश गरेका थिएँ । अहिले त झन् निराश भइसकेकी छु,” भर्जिनियाकी ५५ वर्षीया एक स्वतन्त्र मतदाताले भनेको सीएनएनले उल्ललेख गरेको छ ।
आन्तरिक मामिलामा पनि ट्रम्पको प्रदर्शनप्रति असन्तुष्टि बढेको छ । संघीय सरकारको व्यवस्थापनमा अनुमोदन दर ४२% मा झरेको छ भने उपयुक्त व्यक्तिहरूको नियुक्तिमा विश्वास गर्नेहरूको संख्या पनि ८ अङ्कले घटेर ४६% पुगेको छ । अधिकांश अमेरिकीहरू (५७%) ले ट्रम्पको नेतृत्व शैलीले देशलाई अनावश्यक जोखिममा पारेको बताएका छन् ।
वैदेशिक मामिलामा ट्रम्पले देखाएको रूसप्रति नरम धारणा र विदेशी सहायता कार्यक्रमहरू समाप्त गर्ने निर्णयहरू पनि अस्वीकृत भएका छन् । यसमा ६०% ले असन्तुष्टि जनाएका छन् ।
पहिलो कार्यकालमा अपेक्षाकृत बलियो मुद्दा मानिएको आप्रवासन (इमिग्रेसन) मामिलामा समेत ट्रम्पको अनुमोदन दर ६ अङ्कले घटेर ४५% मा झरेको छ । तर यस्तो नकारात्मक प्रवृत्तिका बीच ट्रम्पले लिङ्ग पहिचानसम्बन्धी नीतिमा भने सानो सकारात्मक समर्थन पाएका छन् । सर्वेक्षणमा ५१% अमेरिकीहरूले “पुरुष र महिला मात्रै हुने” ट्रम्पको नीति समर्थन गरेका छन् । रिपब्लिकनहरूका ९०%, स्वतन्त्रहरूको ४८% र डेमोक्र्याटहरूको १६% ले यसमा समर्थन जनाएका छन् ।
“पुरुष र महिला मात्रै हुने भनेर कानुनीरूपमा घोषणा गर्दा म निकै खुशी भएँ,” मेरील्याण्डकी तीन सन्तानकी आमा तथा ट्रम्प समर्थक लिसा मन्सनले भनिन् ।
कला, संस्कृति र अमेरिकी इतिहासका संस्थाहरूमा ट्रम्पले हस्तक्षेप गर्नु (जस्तै कि केनेडी सेन्टर र स्मिथसोनियन संस्थाहरूमा परिवर्तन ल्याउने प्रयास) भने ६४% अमेरिकीहरूले अनुचित मानेका छन् । उपाध्यक्ष जेडी भ्यान्सको अनुमोदन दर पनि ट्रम्पको जस्तै ४१% मा छ । न त ट्रम्प न त भ्यान्स, दुबैलाई अमेरिकी जनताको बहुमतले सकारात्मक दृष्टिले हेरेका छैनन् ।
सर्वेक्षण अनुसार राष्ट्रपतिको शक्ति जिम्मेवारीपूर्वक प्रयोग गर्ने ट्रम्पको क्षमतामा विश्वास ८ अङ्कले घटेर ४६% मा झरेको छ, भने देशलाई नेतृत्व दिने क्षमतामा विश्वास ९ अङ्कले घटेर ५०% पुगेको छ । कार्यकारी आदेश (एक्जिक्युटिभ अर्डर) हरूको अति प्रयोग र तिनमा अदालतबाट निरस्तीकरणले पनि आलोचना बढाएका छन् ।
“ट्रम्प कार्यकारी आदेशहरूमा धेरै अति गर्छन् । उनी यता उता गोली चलाउने यासेमिटी स्यामजस्तै हुन्,” न्यू मेक्सिकोका आंशिक अवकाशप्राप्त वकिल तथा ट्रम्प समर्थक जर्ज मास्त्रोडोनाटोले भनेका छन् ।
यद्यपि आलोचना बढे पनि, ५२% अमेरिकीहरू ट्रम्पको दोस्रो कार्यकालले देशमा दीर्घकालीन परिवर्तन ल्याउने विश्वास गर्छन् । तर महत्वपूर्ण समस्या समाधान गर्न उनी सफल भएका छन् भन्नेमा विश्वास गर्नेहरू भने केवल २८% मात्र छन् ।
सीएनएन र एसएसआरएसद्वारा सञ्चालित यो सर्वेक्षण अप्रिल १७ देखि अप्रिल २४ सम्म १,६७८ वयस्कहरूमा गरिएको थियो । सर्वेक्षणको त्रुटि सीमा ±२.९ प्रतिशत विन्दु रहेको बताइएको छ ।
