बद्री केसी नेतृत्वको गैरआवासीय नेपाली संघ (एनआरएनए) को १२औँ महाधिवेशनमा अध्यक्षको उम्मेदवार हुन पाँच लाख रुपैयाँ शुल्क तोकिएको छ ।
त्यसैगरी उपाध्यक्षका लागि ३ लाख ५० हजार. महिला र युवा उपाध्यक्षका लागि १ लाख ७५ हजार रुपैयाँ तोकिएको छ भने महासचिवका लागि ३ लाख र उपमहासचिवका लागि २ लाख ७५ हजार तोकिएको छ । सचिव र कोषाध्यक्षका लागि २ लाख ५० हजार तोकिदा महिला सचिवमा लागि १ लाख २५ हजार रुपैयाँ शुल्क निर्धारण गरिएको छ ।
आगामी अक्टोबर ११ देखि १३ तारिखसम्म काठमाडौँमा हुने महाधिवेशनका लागि बुधबारसम्म ५६ देशबाट ४ हजार ६५९ जनाले प्रतिनिधिका लागि नाम दर्ता गराएको बताइएको छ । दर्ता भएका नामावलीलाई राष्ट्रिय समितिहरूले प्रमाणीकरण गरेपछि अन्तिम रूप दिइनेछ ।
संघको विधानअनुसार यस महाधिवेशनमा वर्तमान कार्यसमिति, पूर्वपदाधिकारी, सल्लाहकार तथा राष्ट्रिय समन्वय परिषद् (एनसीसी) का वर्तमान र पूर्वसदस्यहरू प्रतिनिधि बन्न पाउने व्यवस्था छ। प्रमाणीकरणपछि करिब ३ हजार ४०० प्रतिनिधिलाई मात्र मतदानमा सहभागी गराइने एनआरएनएले जनाएको छ ।
