आगामी प्रतिनिधि सभा निर्वाचन नजिकिँदै जाँदा देशभरका मतदाता नाम दर्ता केन्द्रहरूमा भीड बढेको छ । नयाँ मतदाता परिचयपत्र बनाउन सर्वसाधारणको घुइचो लागेपछि निर्वाचन आयोगले सेवा समय विस्तार गरेको छ ।
आयोगका सहसचिव एवम् प्रवक्ता नारायण प्रसाद भट्टराईले जारी गरेको विज्ञप्तिमा २०८२ साल फागुन २० गतेसम्म १८ वर्ष उमेर पूरा हुने सबै नागरिकलाई मतदाता नामावलीमा नाम दर्ता गर्न अपिल गरिएको छ ।
सेवाग्राहीको अत्यधिक भीड व्यवस्थापन गर्न आयोगले दैनिक ८०० भन्दा बढी नाम दर्ता भइरहेका जिल्लाहरूमा दुई सिफ्टमा सेवा दिने निर्णय गरेको छ । अब ती जिल्लामा ६/६ घण्टाका दरले १२ घण्टा दैनिक सेवा उपलब्ध हुनेछ ।
आयोगका अनुसार, काठमाडौं उपत्यकाका तीन जिल्लामा नाम दर्ता केन्द्रहरूमा देखिएको चापलाई मध्यनजर गर्दै राष्ट्रिय परिचयपत्र तथा पञ्जीकरण विभागबाट थप १४ जना दर्ता कर्मचारी खटाइने व्यवस्था मिलाइएको छ ।
त्यसैगरी, अन्य जिल्लाहरूमा सेवाग्राहीको चापका आधारमा थप जनशक्ति खटाउन प्रमुख जिल्ला अधिकारीहरूलाई गृह मन्त्रालयमार्फत निर्देशन दिइएको आयोगले जनाएको छ ।
आयोगले नागरिकलाई भीडभाड कम हुने समय र दिनमा पुगेर नाम दर्ता गर्न अनुरोध गर्दै भनिएको छ, “निर्वाचनमा सहभागी हुनका लागि मतदाता नामावलीमा दर्ता हुनु अनिवार्य भएकाले समयमै प्रक्रिया पूरा गर्न सबै पात्र नागरिकलाई अनुरोध गर्दछौं ।”
