अमेरिकी व्यापारी तथा दोषी ठहर भइसकेका यौन अपराधी जेफ्री एप्स्टीनले आफ्ना व्यक्तिगत पत्राचारमा पूर्वराष्ट्रपति डोनाल्ड ट्रम्पको नाम पटक–पटक उल्लेख गरेका तथ्य सार्वजनिक भएका छन् । अमेरिकी प्रतिनिधि सभाको हाउस ओभरसाइट कमिटीका डेमोक्र्याट सदस्यहरूले सार्वजनिक गरेका इमेलहरूमा एप्स्टीनले ट्रम्पबारे पछिल्ला १५ वर्षयता लेखेका संवादहरू समावेश छन् ।
यी इमेलहरू एप्स्टीनकी दीर्घकालीन सहकर्मी गिस्लिन म्याक्सवेल र लेखक माइकल वोल्फलाई पठाइएका हुन् । म्याक्सवेल एप्स्टीनको मृत्युपछि मानव तस्करीको अभियोगमा जेल सजाय काटिरहेकी छिन् । इमेलहरूमा एप्स्टीनले ट्रम्पले आफ्नो “पीडित” भनेर वर्णन गरिएकी एक महिलासँग समय बिताएको दाबी गरेका छन् । त्यसैगरी उनले अर्को सन्देशमा ट्रम्प “केटीहरूबारे जान्दथे” भन्ने उल्लेख गरेका छन् ।
यी इमेलहरू यसै वर्ष डेमोक्र्याट सांसदहरूले एप्स्टीनको सम्पत्ति छानविनका क्रममा प्राप्त गरेका हुन् । ट्रम्प स्वयंले ती सन्देश पठाएका वा पाएका होइनन् र उनलाई एप्स्टीन वा म्याक्सवेल प्रकरणमा कुनै आपराधिक अभियोग लागेको छैन ।
लेखक माइकल वोल्फले सीएनएनसँग भनेका छन्, “म सन्दर्भ ठ्याक्कै सम्झिँदैन, तर त्यो समयमा म एप्स्टीनसँग उनको ट्रम्पसँगको सम्बन्धबारे गहिरो छलफलमा थिएँ ।”
२०११ अप्रिल २ तारिखको एक इमेलमा एप्स्टीनले म्याक्सवेललाई लेखेका छन्, “त्यो कुकुर जसले भुकेको छैन, त्यो ट्रम्प हो……..मेरा घरमा उनीसँग घण्टौँ बिताइन्, तर उनको नाम कहिल्यै आएको छैन ।” म्याक्सवेलले जवाफ दिएकी थिइन्, “म पनि त्यसैबारे सोच्दै थिएँ…”
रिपब्लिकन सांसदहरूले ती महिलालाई भर्जिनिया जिउफ्रे भएको दाबी गरेका छन्, जो एप्स्टीनकी प्रमुख बाँचेकामध्ये एक पीडित थिइन् र गत अप्रिलमा आत्महत्या गरेकी थिइन् । तर उनले आफ्नो पुस्तक नवडीज् गर्लमा ट्रम्पविरुद्ध कुनै आरोप लगाएकी छैनन् ।
एप्स्टीनले सन् २००८ मा नाबालिगसमेतको यौन शोषण सम्बन्धी अभियोगमा दोषी ठहरिएपछि १८ महिनाको जेल सजाय पाएका थिए र १३ महिना पछि छुटेका थिए । उनको मृत्यु सन् २०१९ मा जेलमै भएको थियो ।
यसैबीच, म्याक्सवेलले यस वर्ष अमेरिकी न्याय विभागका अधिकारीसँग दिएको बयानमा “ट्रम्पलाई कुनै अनुचित परिस्थितिमा कहिल्यै नदेखेको” बताएकी छिन् । उनका अनुसार, ट्रम्प र एप्स्टीन सामाजिक कार्यक्रममा भने भेटिने गर्थे ।
ट्रम्प र एप्स्टीनबीचको सम्बन्ध लामो समयदेखि सार्वजनिक चर्चामा रहँदै आएको छ । एप्स्टीनको फाइल सार्वजनिक गर्ने माग कङ्ग्रेसमा तीव्र बनेको छ ।
हालै सार्वजनिक इमेलहरूमध्ये एक २०१९ जनवरीको हो, जसमा एप्स्टीनले वोल्फलाई ट्रम्पको म्यार-ए-लागो क्लब सदस्यता सम्बन्धी दाबीबारे लेखेका छन् । उनले लेखेका छन्, “ट्रम्पले भन्यो मैले राजीनामा दिएँ, तर म कहिल्यै सदस्य थिइनँ । उसले केटीहरूबारे जान्दथ्यो, गिस्लिनलाई रोक्न पनि भनेको थियो ।”
सन् २०१५ डिसेम्बर १५ को अर्को इमेलमा वोल्फले एप्स्टीनलाई सीएनएन डिबेटमा ट्रम्पसँग उनको सम्बन्धबारे प्रश्न सोधिन सक्ने जानकारी दिएका थिए । एप्स्टीनले जवाफमा लेखेका थिए, “यदि हामीले उसको लागि जवाफ तयार गर्न सकेँ भने, के हुन सक्छ?” वोल्फले प्रत्युत्तर दिएका थिए, “उसलाई आफ्नै कुरा बोल्न देऊ, त्यसबाट तिमीलाई राजनीतिक फाइदा मिल्न सक्छ ।”
वोल्फले सार्वजनिक रूपमा एप्स्टीनसँग अन्तर्वार्ता गरेको बताएका छन्, र द डेली बिस्टका अनुसार उनीसँग ट्रम्प र एप्स्टीनबीचको सम्बन्धबारे लामो रेकर्ड गरिएको सामग्री पनि छ । ट्रम्प पक्षले भने ती सबै ‘झूटा र बदनाम गर्ने प्रयास’ भएको प्रतिक्रिया दिएको छ ।
