वैकल्पिक राजनीतिक शक्तिहरू छुट्टिएर चुनावमा जाँदा फेरि पुरानै दलहरूको वर्चस्व कायम हुने जोखिम देखिएको निष्कर्षसँगै रास्वपा, उज्यालो नेपाल पार्टी र काठमाडौंका मेयर बालेन शाह नजिकका समूहहरूबीच सहकार्यका लागि सघन संवाद तीव्र बनेको छ ।
यो प्रयासलाई निष्कर्षमा पुर्याउन जेनजीका समूहहरूले समेत दबाब बढाएका छन् । द काउन्सिल अफ जेनजीका अगुवा सुदन गुरुङ बिहीबार नख्खु जेल पुगेर रास्वपा सभापति रवि लामिछानेलाई भेटेका छन् ।
जेल भेटमा गुरुङले वैकल्पिक शक्तिहरू मिलेर पुराना दललाई चुनौती दिनुपर्ने प्रस्ताव राखेका थिए । भेटको विवरण सुनाउँदै उनले रवि लामिछाने पनि सहकार्यका पक्षमा सकारात्मक रहेको बताएका छन् । उता उनले आफ्नै पहलमा कुलमान घिसिङ र बालेन शाहबीच पनि भेट गराएको दाबी गरेका छन् । उज्यालो नेपाल नेताहरूले पनि उक्त भेटमा गुरुङकै योगदान रहेको स्वीकार गरेका छन् ।
वैकल्पिक एकताको पृष्ठभूमिमा रास्वपा पनि सक्रिय देखिएको छ । रास्वपा प्रवक्ता मनिष झाले सबै पक्षबीच सहकार्यका विषयमा सकारात्मक छलफल भइरहेको जानकारी दिएका छन् । उनका अनुसार गठबन्धन गर्ने सहमतिमा पहुँच भइसकेको छ भने नाम र चुनाव चिह्न जस्ता विषयमा पनि संवाद अन्तिमतिर पुगेको छ ।
उनेपा पक्षका नेताहरूका अनुसार यसपटक उनीहरूले पहिलेभन्दा बढी लचकता देखाएका छन्। कुलमान घिसिङलाई भविष्यको ‘प्रधानमन्त्रीका उम्मेदवार’ का रूपमा अघि सार्ने प्रस्ताव सर्वाधिक चर्चामा छ भने रवि लामिछानेलाई पार्टी अध्यक्षकै रूपमा कायम राख्ने विषय पनि सहमतिको एजेण्डामा परेको छ। भारतजस्तै पार्टी अध्यक्ष र प्रधानमन्त्री फरक व्यक्तिले सम्हाल्ने अभ्यास नेपालमा पनि लागू गर्न सकिने तर्क प्रस्तुत गरिएको छ।
पार्टीको नामबारे पनि विभिन्न विकल्प छलफलमा आएका छन् । राष्ट्रिय उज्यालो पार्टी, उज्यालो स्वतन्त्र पार्टी, राष्ट्रिय उज्यालो स्वतन्त्र पार्टी आदि । तर निर्वाचन आयोगमा भाग लिन समय थोरै बुझेपछि तत्काल रास्वपाको नाम र चिह्नमै चुनावमा गएर पछि महाधिवेशनमार्फत् नाम परिवर्तन गर्न सकिने प्रस्ताव बलियो रूपमा उभिएको छ ।
उता रास्वपाभित्र भने नेतृत्वको वरिपरि रहेका केही ब्यक्तिहरुले कुलमान प्रवेशसँगै आफ्नो प्रभाव घट्ने चिन्ताले एकता प्रक्रियामा बाधा पुर्याइरहेको स्रोतहरूले बताएका छन् ।
