निर्वाचन आयोगले गगनकुमार थापा नेतृत्वको कार्यसमितिलाई नेपाली कांग्रेसको आधिकारिकता दिने निर्णय गरेलगत्तै शेरबहादुर देउवा पक्षले यसलाई ‘षड्यन्त्रपूर्ण’ भन्दै अस्वीकार गर्ने घोषणा गरेको छ ।
शुक्रबार साँझ निर्वाचन आयोग परिसरमा सञ्चारकर्मीहरूसँग कुरा गर्दै पार्टीका कार्यवाहक सभापति पूर्णबहादुर खड्काले आयोगको निर्णय त्रुटिपूर्ण रहेको दाबी गर्दै यसका विरुद्ध कानुनी लडाइँ लड्ने चेतावनी दिएको हो । खड्काले १४औँ महाधिवेशनबाट निर्वाचित सभापतिसँग कुनै परामर्श नै नगरी एकपक्षीय रूपमा निर्णय गरिएको भन्दै आक्रोश व्यक्त गरे ।
आयोगको यो कदमपछि देउवा पक्षीय नेता तथा कार्यकर्ताहरू रुष्ट बनेका छन्। निर्णय सार्वजनिक भएलगत्तै निर्वाचन आयोग परिसरमा भेला भएका कार्यकर्ताहरूले आयोग र सरकारका विरुद्ध चर्को नाराबाजी समेत गरेका छन्। परिस्थिति तनावपूर्ण बनेपछि देउवा पक्षले आफ्नो रणनीति तय गर्नका लागि तत्कालै कदम चालेको छ।
यसैबीच, कार्यवाहक सभापति पूर्णबहादुर खड्काले शनिबार बिहान ८ बजेका लागि पार्टी केन्द्रीय कार्यालय सानेपामा केन्द्रीय कार्यसमितिको आकस्मिक बैठक बोलाएको छ । मुख्यसचिव कृष्णप्रसाद पौडेलका अनुसार उक्त बैठकमा पार्टीका पदाधिकारी, केन्द्रीय सदस्य, आमन्त्रित सदस्य र सातै प्रदेशका सभापतिहरूलाई अनिवार्य उपस्थित हुन निर्देशन दिइएको छ । आधिकारिकता गुमाएको अवस्थामा पनि देउवा पक्षले पार्टी कार्यालयमै बैठक आह्वान गर्नुलाई आयोगको निर्णयविरुद्धको प्रतिवादका रूपमा हेरिएको छ ।
