प्रतिनिधिसभाका १६५ प्रत्यक्ष सिटमध्ये अहिलेसम्म सार्वजनिक रुझानमा राष्ट्रिय स्वतन्त्र पार्टी (रास्वपा) ले देशभरि नै ऐतिहासिक अग्रता हासिल गरेको छ। काठमाडौँ उपत्यकाका अधिकांश क्षेत्रमा रास्वपाका उम्मेदवारहरूले विजयको घोषणा गरिसकेका छन् भने झापा, मोरङ र कास्की जस्ता जिल्लाहरूमा पनि ‘घण्टी’ को दबदबा देखिएको छ। निर्वाचन आयोगले केही दुर्गम क्षेत्रबाहेक धेरैजसो स्थानको नतिजा आज रातिसम्म सार्वजनिक गरिसक्ने लक्ष्य राखेको छ।
बालेन्द्र शाहको फराकिलो अग्रता र ओलीको चुनौती
यस निर्वाचनकै सबैभन्दा बढी चर्चामा रहेको क्षेत्र झापा निर्वाचन क्षेत्र नं ५ मा बालेन्द्र शाह (बालेन) ले आफ्नो अग्रतालाई अत्यन्तै सुरक्षित बनाएका छन्। पछिल्लो विवरण अनुसार बालेनले १५ हजारभन्दा बढी मत प्राप्त गर्दा नेकपा एमालेका अध्यक्ष केपी शर्मा ओलीले ३ हजारको हाराहारीमा मात्र मत पाएका छन्। यो मतान्तरले पुराना राजनीतिक हस्तीहरूका लागि ठुलो धक्का दिएको छ। यदि यही गति कायम रहेमा बालेन शाह देशको आगामी प्रधानमन्त्री बन्ने दौडमा सबैभन्दा अगाडि रहने देखिएको छ।
काठमाडौँमा नयाँ अनुहारहरूको विजय
राजधानी काठमाडौँका १० वटा निर्वाचन क्षेत्रमध्ये धेरैमा नयाँ पुस्ताका उम्मेदवारहरू विजयी भएका छन्। काठमाडौँ क्षेत्र नं १ बाट रन्जु न्यौपाने (दर्शना) ले भारी मतान्तरले जीत दर्ता गरेकी छिन्। त्यस्तै, काठमाडौँ–६ बाट शिशिर खनाल र काठमाडौँ–८ बाट विराजभक्त श्रेष्ठ, काठमाडौँ–३ मा राजुनाथ पाण्डेलगायतले सिट सुरक्षित गरिसकेका छन्। काठमाडौँका मतदाताले यस पटक पुराना दलहरूलाई पूर्ण रूपमा नकारेको मत परिणामले देखाएको छ, जहाँ धेरैजसो स्थापित नेताहरूको जमानत समेत जोखिममा परेको छ।
स्थापित नेताहरूको संघर्ष र मिश्रित नतिजा
नेपाली कांग्रेसका महामन्त्री गगन थापा सर्लाही–४ बाट चुनावी मैदानमा छन्, जहाँ उनी र अम्रेस कुमार सिंहबीच कडा प्रतिस्पर्धा भइरहेको छ। पछिल्लो अपडेट अनुसार त्यहाँ गगन थापा केही मतले पछाडि परेका छन्। उता रुकुम पूर्व–१ बाट माओवादी केन्द्रका अध्यक्ष पुष्पकमल दाहाल ‘प्रचण्ड’ ले जीत हात पारेका छन् । मोरङमा शेखर कोइराला लगायतका नेताहरू पनि नयाँ शक्तिको तीव्र प्रतिस्पर्धाका कारण दबाबमा देखिएका छन्।
समानुपातिकतर्फ पनि ‘घण्टी’ को लहर
प्रत्यक्षतर्फ मात्र नभई समानुपातिकतर्फको प्रारम्भिक गणनामा पनि राष्ट्रिय स्वतन्त्र पार्टीले झन्डै ५९ प्रतिशत मत प्राप्त गरेको छ। यसले गर्दा आगामी संसदमा रास्वपाले एकल बहुमत प्राप्त गर्ने सम्भावना प्रबल बनेको छ। दोस्रो स्थानका लागि नेपाली कांग्रेस र नेकपा एमाले बीच प्रतिस्पर्धा भईरहेको छ ।
