विक्रम मिश्रीको नेपाल भ्रमण स्थगित भएको छ। सरकारी उच्च स्रोतका अनुसार आगामी मे ११ देखि हुने भनिएको दुई दिने भ्रमण हालका लागि सारिएको हो ।
बालेन्द्र शाहको नेतृत्वमा नयाँ सरकार बनेपछि भारत ले विदेश सचिव मिश्रीलाई काठमाडौं पठाउने निर्णय गरेको थियो । नयाँ सरकारका प्राथमिकता बुझ्ने तथा द्विपक्षीय सम्बन्धलाई नयाँ आयाम दिने उद्देश्यसहित भ्रमण तय गरिएको बताइए पनि अन्तिम समयमा आएर स्थगित गरिएको हो ।
भारतीय पक्षले मिश्रीको अन्य व्यस्तता र प्रतिबद्धताका कारण भ्रमण सारिएको जानकारी नेपाललाई दिएको छ । तर भ्रमण स्थगित हुनुको वास्तविक कारणबारे भने नयाँदिल्लीले स्पष्ट खुलाएको छैन ।
यसबीच भारतले लिपुलेक विवादमा नेपालको अडानलाई फेरि अस्वीकार गरेको छ । भारतीय विदेश मन्त्रालयका प्रवक्ता रणधीर जैसवाल ले बिहीबार आयोजित साप्ताहिक पत्रकार सम्मेलनमा लिपुलेक–कैलाश मानसरोवर मार्ग नयाँ विषय नभएको दाबी गरे ।
उनले उक्त मार्ग सन् १९५४ देखि सञ्चालनमा रहेको उल्लेख गर्दै नेपालले उठाएको सीमा सम्बन्धी दाबीलाई “त्रुटिपूर्ण” बताएका छन् । जैसवालले बाँकी सीमा विवाद वार्ताबाट समाधान गर्न भारत तयार रहेको बताए पनि “एकतर्फी दाबी गर्ने शैली उचित नभएको” टिप्पणी गरे ।
नेपाल सरकारले वैशाख २० गते नेपाली भूमि लिपुलेक हुँदै भारत र चीनले कैलाश मानसरोवर यात्रा सञ्चालन गर्न लागेको भन्दै दुवै देशलाई कूटनीतिक नोट पठाएको थियो । त्यसको भोलिपल्ट भारतले नेपाललाई जवाफ पठाउँदै नेपाली दाबीप्रति असहमति जनाएको थियो । बिहीबार पुनः भारतले आफ्नो पुरानै अडान दोहोर्याएको हो ।
यद्यपि भारतीय पक्षले नेपालसँगको आर्थिक तथा रणनीतिक सहकार्य निरन्तर रहने जनाएको छ । प्रवक्ता जैसवालले पेट्रोलियम पदार्थ र रासायनिक मल आपूर्ति दुई देशबीचको सम्झौताअनुसार नियमित रूपमा भइरहेको र आगामी दिनमा पनि जारी रहने बताएका छन् ।
