राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) मुलुकको नयाँ प्रधानमन्त्री बन्न लागेकोमा मधेसवादी दलहरुको गठबन्धन संघीय लोकतान्त्रिक मोर्चाले स्वागत गर्दै खुसी प्रकट गरेको छ ।
जनता समाजवादी पार्टी (जसपा) नेपालका संरक्षक महन्थ ठाकुरको अध्यक्षतामा शुक्रबार बसेको मोर्चाको मूल समितिको बैठकले शाहको नेतृत्वलाई समर्थन गर्ने औपचारिक निर्णय गरेको हो । बैठकपछि जारी विज्ञप्तिमा मोर्चाले प्रतिनिधिसभा सदस्य निर्वाचन २०८२ मा आम जनताले बालेनको नेतृत्वलाई दिएको व्यापक जनसमर्थनको कदर गर्दै उनी प्रधानमन्त्रीको भूमिकामा देखिनु उत्पीडित समुदायका लागि गर्वको विषय भएको उल्लेख गरेको छ ।
मोर्चाले नवनियुक्त हुन लागेका प्रधानमन्त्री शाहलाई बधाई तथा शुभकामना दिँदै उनको कार्यकालमा मधेसी, थारू, आदिवासी र जनजाति लगायतका समुदायले लामो समयदेखि उठाउँदै आएका मागहरू सम्बोधन हुने विश्वास व्यक्त गरेको छ । विशेष गरी संविधान संशोधन, प्रदेशको सीमांकन हेरफेर र जनसंख्याको आधारमा समानुपातिक प्रतिनिधित्व जस्ता मुद्दाहरू नयाँ सरकारको प्राथमिकतामा पर्ने मोर्चाको अपेक्षा छ ।
यसका साथै विगतका आन्दोलन र बलिदानबाट प्राप्त गणतन्त्र, संघीयता, लोकतन्त्र र समावेशिता जस्ता उपलब्धिहरूलाई संस्थागत गर्न बालेन नेतृत्वको सरकारले ठोस कदम चाल्नेमा मोर्चा आशावादी देखिएको छ । लाल आयोगको प्रतिवेदन सार्वजनिक गर्ने र संघीयतालाई थप सुदृढ बनाउने लगायतका अधुरा कामहरू नयाँ नेतृत्वबाट पुरा हुने विश्वासका साथ मोर्चाले आफ्नो तर्फबाट रचनात्मक सहयोग रहने संकेत समेत दिएको छ ।
