समस्याग्रस्त सहकारीहरूको व्यवस्थापन गरिरहेको समस्याग्रस्त सहकारी व्यवस्थापन समितिले आगामी जेठ पहिलो साताबाट बचत फिर्ता प्रक्रिया सुरु गर्ने घोषणा गरेको छ ।
समितिका अनुसार करिब ७६ हजार बचतकर्ताको झन्डै ४६ अर्ब रुपैयाँ फिर्ता गर्न बाँकी रहेको छ । हालसम्म सरकारबाट चक्रीय कोषमार्फत २६ करोड रुपैयाँ सापटी लिइएको र ऋणीहरूबाट करिब ६० करोड रुपैयाँ कर्जा असुल भइसकेको जानकारी दिइएको छ ।
समितिले बचतकर्तालाई रकम फिर्ता गर्न कर्जा असुलीलाई प्राथमिकतामा राख्ने स्पष्ट पारेको छ । जारी विज्ञप्तिअनुसार पहिलो चरणमा मागदाबी गरेका बचतकर्तालाई रकम फिर्ता गरिनेछ भने छुट भएका बचतकर्ताका लागि पुनः मागदाबी खुला गरिने तयारी गरिएको छ ।
त्यस्तै, बचत मिलानका लागि वैज्ञानिक तथा न्यायपूर्ण कार्यविधि निर्माण गरिने समितिले जनाएको छ ।
कर्जा असुलीलाई प्रभावकारी बनाउन समितिले कडा नीति अवलम्बन गर्ने भएको छ । किस्ताबन्दीमा भुक्तानी गर्न लिखित प्रतिबद्धता जनाउने ऋणीलाई निश्चित समय दिइनेछ भने अटेरी गर्नेहरूको तीनपुस्ते विवरण सार्वजनिक गर्ने र परिवारका सदस्यसमेतलाई कालोसूचीमा राख्ने चेतावनी दिइएको छ ।
यससँगै गुनासो व्यवस्थापन र सूचना प्रवाहलाई नियमित बनाउने, सरोकारवालासँग छलफल गर्ने तथा आन्तरिक पुनःसंरचना र कार्ययोजना निर्माणलाई तीव्रता दिने योजना पनि अघि सारिएको छ ।
समितिले कार्यसम्पादन प्रभावकारी बनाउन विज्ञ तथा सचेत नागरिकसँग सुझाव र सहयोगको अपिलसमेत गरेको छ ।
