प्रधानमन्त्री पुष्पकमल दाहालको भदौ ३० गतेदेखि सुरु हुने संयुक्त राज्य अमेरिकाको भ्रमणमा दश जना निजी सचिवालयका सदस्यहरु जाने भएका छन् ।
संयुक्त राष्ट्रसंघको ७८ औं महासभामा भाग लिन जान लागेका प्रधानमन्त्रीको टोलीमा कुल २४ जना सदस्य रहेका छन् । त्यस मध्ये दश जना निजी सचिवालयबाट जाने भएका हुन् ।
भ्रमण दलका सदस्यहरुमा प्रधानमन्त्रीका मुख्य सल्लाहकार हरिबोल गजुरेल, स्वकीय सचिवहरू गंगा दाहाल, रमेश मल्ल, प्रेस सल्लाहकार गोविन्द आचार्य, निजी फोटोग्राफरहरु प्रदीपराज वन्त, निजी भिडिओग्राफर नवराज दाहाल, निजी डाक्टर युवराज शर्मा र तीन जना सुरक्षाकर्मी छन् ।
त्यस्तै मुख्यसचिव बैकुण्ठ अर्याल र राष्ट्रिय सुरक्षा सल्लाहकार शंकरदास बैरागी पनि भ्रमण टोलीमा छन् । यसैगरी परराष्ट्रमन्त्री एनपी साउद, उनका स्वकीय सचिव दीपक जोशी, परराष्ट्र सचिव भरतराज पौड्याल, सहसचिव सेवा लम्साललगायत प्रतिनिधि भ्रमण दलमा रहने छन् ।
उनले राष्ट्र संघको ७८ औं महासभालाई असोज ४ गते सम्बोधन गर्ने कार्यक्रम रहेको छ ।
न्युयोर्कमा रहँदा प्रधानमन्त्री प्रचण्ड दीगो विकास लक्ष्य सम्मेलन, क्लाइमेट एम्बिसन समिटलगायत अन्य महत्वपूर्ण एजेन्डासहितका उच्चस्तरीय कार्यक्रममा सहभागी हुने तय भएको परराष्ट्र मन्त्री साउदले जानकारी दिए । अमेरिकी राष्ट्रपति जो बाइडेनले महासभामा सहभागी हुन आएका विभिन्न देशका राष्ट्र तथा सरकार प्रमुखको सम्मान दिने रात्रीभोजमा पनि प्रधानमन्त्री प्रचण्ड सहभागी हुनेछन् ।
