नेपाल विद्युत् प्राधिकरण भरतपुर वितरण केन्द्रको डिजिटल बोर्डमा प्रधानमन्त्री केपी शर्मा ओलीविरुद्ध अपशब्द लेखिएको सूचना प्रसारण भएपछि हंगामा भएको छ ।
भारतप्र वितरण केन्द्रका कार्यालय प्रमुख वरिष्ठ इन्जिनियर रामु श्रेष्ठले बोर्ड ह्याक गरेर आफूलाई फसाइएको बताएका छन् भने एमालेको भातृ संगठनहरु युवा संघ र अनेरास्ववियूले उनको राजीनामा माग गरेका छन् ।
उक्त विवरण सार्वजनिक भएपछि मंगलबार नै एमाले कार्यकर्ताको एक समुह श्रेष्ठको कार्यालयमा पुगेर तोडफोड गर्नुका साथै उनीमाथि हातपात गरेका छन् ।
श्रेष्ठले भने पासवर्ड ह्याक गरेर उक्त डिजिटल बोर्डमा अपशब्द लेखेर सार्वजनिक गरिएको दावी गरेका छन् ।
अन्य समयमा उक्त बोर्डमा बिजुलीको मितव्ययीताका सूचनाहरु मात्रै डिस्प्ले हुन्थ्यो । सोमबार (हिजो) नेपाल विद्युत प्राधिकरणका कार्यकारी निर्देशक कुलमान घिसिङको पद जाने हल्ला चलिरहेकै बेला भरतपुर वितरण केन्द्रको बोर्डमा प्रधानमन्त्रीलाई गाली गरेर लेखेको सूचना प्रशारण भएको थियो ।
सोमबार दिउँसो १२ बजेदेखि १ बजेसम्म यो नारा डिस्प्लेमा देखिएको बताइएको छ । बिजुलीको बिल तिर्न कार्यालय परिसर पुगेका सेवाग्राहीले हो–हल्ला गरेपछि १ बजेको समयमा उक्त नारा हटाइएको थियो ।
