अमेरिकी राष्ट्रपति डोनाल्ड ट्रम्प को फ्लोरिडास्थित निजी निवास ‘मार–आ–लागो’मा सुरक्षा घेरा तोडेर प्रवेश गर्न खोज्ने एक व्यक्तिको सुरक्षाकर्मीको गोली हानी हत्या गरेका छन् ।
शटगन र इन्धनको जर्किन बोकेर भित्र छिर्न खोजेका ती व्यक्तिलाई रोक्ने क्रममा भएको मुठभेडमा उनको ज्यान गएको अमेरिकी अधिकारीहरूले पुष्टि गरेका छन् ।
अमेरिकी सुरक्षा निकाय सीक्रेट सर्भिसका अनुसार संदिग्ध व्यक्ति मार–आ–लागोको उत्तरतर्फको गेटबाट एउटा सवारी साधन बाहिर निस्कने मौका छोपी परिसरभित्र छिर्न खोजेका थिए । घटनाका बेला राष्ट्रपति ट्रम्प भने आफ्नो साप्ताहिक कार्यतालिका अनुसार वासिङ्टन डीसीस्थित ह्वाइट हाउसमा रहेको जनाइएको छ ।
सीक्रेट सर्भिसका प्रवक्ता एन्थोनी गुग्लिएल्मीले जारी गरेको वक्तव्यमा संदिग्ध व्यक्तिलाई शटगन र इन्धनको क्यान बोकेको अवस्थामा सुरक्षाकर्मीले फेला पारेको उल्लेख छ। उनलाई नियन्त्रणमा लिन खोज्दा भएको प्रतिकारका क्रममा गोली चलेको र घटनास्थलमै उनको मृत्यु भएको जानकारी दिइएको छ। घटनामा कुनै पनि सुरक्षाकर्मी घाइते नभएको बताइएको छ।
