सुन तस्करसँगको साँठगाँठ देखिंदा पनि पक्राउ नगरिएको भन्दै व्यापक दवाव परेपछि प्रहरीले माओवादी नेता तथा पूर्व सभामुख कृष्णबहादुर महराका छोरा राहुललाई बुधबार पक्राउ गरेको छ ।
विद्युतीय चुरोट (भेप) मा लुकाएर भित्र्याइएको तस्करीको सुन प्रकरणमा जोडिएका महरा बाबुछोरालाई उन्मुक्ति दिन खोजिएको भन्दै सरकार र प्रहरीको व्यापक अलोचना हुँदै आएको थियो । प्रहरीको केन्द्रीय अनुसन्धान ब्युरो (सीआईबी) ले उनलाई बुधबार काठमाडौंबाट पक्राउ गरेर अदालतबाट अनुसन्धानको लागि पाँच दिनको म्यादसमेत थप गरेको छ ।
सुन तस्करीमा संलग्न चिनियाँ गिरोहसँग महरा बाबुछोराको पटक–पटक टेलिफोन संवाद भएको सरकारी अनुसन्धानबाटै पुष्टि भइसकेको छ । चिनियाँ तस्कर र उसको समूहसँग बाबुछोराले २ सय ५६ पटक फोन सम्पर्क गरेको खुलिसकेको छ ।
महराले अर्का छोरा निर्मलका नाममा रहेको मोबाइलबाट तस्करीमा संलग्न हाल फरार चिनियाँ नागरिक लुई हानसोङसँग ११ पटक सम्पर्क गरेको सीआईबीले किटान गरेर प्रतिवेदन तयार पारिसकेको छ । सुन तस्कर दाओजिन वाङले पनि महरालाई ११ पटक फोन सम्पर्क गरेका थिए । त्यही बेला महराका अर्का छोरा राहुलसँग २८ पटक सम्पर्क भएको देखिन्छ । राहुललाई सुन तस्कर दाओजिन वाङले ६४ पटक र राहुलले दाओजिनलाई १ सय ३१ पटक सम्पर्क गरेको देखिन्छ । अर्का चिनियाँ तस्करलाई राहुलले ३ पटक सम्पर्क गरेका थिए । राहुलले नै फरार अर्का व्यक्ति लोकेन्द्र पौडेललाई ३६ पटक सम्पर्क गरेको देखिन्छ ।
सुन लुकाएर ल्याएको विद्युतीय चुरोट (भेप) त्रिभुवन अन्तर्राष्ट्रिय विमानस्थलमा पक्राउ परेपछि त्यसलाई छुटाउनको लागि महराका बाबुछोराले विमानस्थलस्थित भन्सारका प्रमुखलाई फोन गरेर छुटाउन कोशिस गरेको समेत बताइएको छ ।
