काठमाडौं उपत्यकामा जाडो याम अन्त्यतिर लाग्दै गर्दा तापक्रम बिस्तारै बढ्दै गएको छ । मौसम पूर्वानुमान महाशाखाका अनुसार आज (माघ २४ गते) काठमाडौंको न्यूनतम तापक्रम ६.९ डिग्री सेल्सियस पुगेको छ । यो शुक्रबारको ५.६ डिग्री सेल्सियसभन्दा बढी हो ।
गत पुस ३० गते काठमाडौंको न्यूनतम तापक्रम २.३ डिग्री सेल्सियससम्म झरेको थियो । त्यसयता क्रमशः बढ्दै गएर आज झन्डै ७ डिग्रीमा उक्लिएको छ । मौसमविद्हरूका अनुसार काठमाडौं सहित देशभर नै न्यूनतम तापक्रम बढ्दो क्रममा छ, जसले जाडोको चिसो कम हुँदै गएको संकेत गर्छ ।
न्यूनतम तापक्रम बिहानको सबैभन्दा कम तापक्रम हो भने अधिकतम तापक्रम दिउँसोको सबैभन्दा उच्च तापक्रम हो । महाशाखाले हरेक दिन बिहान ८:४५ बजे न्यूनतम र साँझ ५:४५ बजे अधिकतम तापक्रम मापन गर्छ ।
फेब्रुअरीको अन्त्यसँगै विन्टर सिजन सकिन्छ र मार्चबाट प्रि-मनसुन सुरु हुन्छ । यस वर्ष मनसुन सरदर मितिभन्दा १५ दिन अगाडि (मे २९) प्रवेश गरेको थियो भने बाहिरिँदा पनि ८ दिन ढिला (अक्टोबर १०) मा मात्र बाहिरिएको थियो ।
अहिले जाडोको अन्तिम चरणमा तापक्रम वृद्धिले मौसम न्यानो हुँदै गएको छ । तराईमा हुस्सु/कुहिरो कायमै रहन सक्छ, तर पहाडी क्षेत्रमा क्रमशः सुधार आउँदै छ। जाडोबाट वसन्ततर्फको यो संक्रमणले काठमाडौंवासीहरूलाई केही राहत मिलेको छ ।
