पोखराको सूर्यदर्शन सहकारी ठगी प्रकरणमा रवि लामिछानेविरुद्ध जाहेरी दिएका व्यक्तिनै अर्को सहकारी ठगी आरोपमा पक्राउ परेका छन् । सूर्यदर्शन प्रकरणमा कृष्णप्रसाद जैसीले जीबी राई र रवि लामिछानेलगायतविरुद्ध जाहेरी दिएका थिए । अहिले उनी आफै पोखराको धनुष बचत तथा ऋण सहकारी ठगी प्रकरणमा प्रमुख योजनाकारका रूपमा पक्राउ परेका हुन् ।
सूर्यदर्शन सहकारीका पीडितहरूको संघर्ष समितिका तर्फबाट आन्दोलनदेखि अदालतसम्म सक्रिय भूमिका खेलेका जैसीलाई गण्डकी प्रदेश सहकारी रजिस्ट्रारको कार्यालयको जाहेरीका आधारमा आइतबार जिल्ला प्रहरी कार्यालय कास्कीले पक्राउ गरेको हो ।
रजिस्ट्रार कार्यालयका अनुसार धनुष सहकारीमा १२ करोड ५६ लाख रुपैयाँ हिनामिना भएको वित्तीय विश्लेषक निर्मल गौतमको प्रतिवेदनपछि थप अनुसन्धानका लागि प्रहरीलाई पत्राचार गरिएको थियो । प्रारम्भिक छानबिनमै १९ करोड १८ लाख रुपैयाँ हिनामिनाको विवरण आएको भए पनि अहिलेसम्म ६ करोड रुपैयाँ मात्र असुल भएको र बाँकी रकम शोधभर्ना नभएकाले प्रहरी अनुसन्धान अघि बढाइएको जनाइएको छ ।
प्रहरीले जैसीलाई नियन्त्रणमा लिएको छ भने अन्य चार जनाविरुद्ध पक्राउ पुर्जी जारी गरिएको जनाएको छ ।
अनुसन्धान प्रतिवेदनअनुसार सहकारीको रकम हिनामिनामा साविक साइनो सहकारीका अध्यक्ष गमरेजसिंह गुरुङ, सञ्चालक काशीमाया गुरुङ, उनीहरूकी छोरी सिर्जना गुरुङ तथा एभिएस इन्जिनियरिङ कन्सल्टेन्सीका सञ्चालक असिम बरालको संलग्नतामा करिब ३ करोड रुपैयाँ हिनामिना भएको उल्लेख छ ।
यस्तै धनुष सहकारीतर्फ व्यवस्थापक विराज सुवेदीले २ करोड २५ लाख र जगत पौडेलले १ करोड २५ लाख रुपैयाँ हिनामिना गरेको प्रतिवेदनमा औंल्याइएको छ । सोही प्रतिवेदनले जैसीले पनि ऋण उपसमितिमा प्रवेश गरी कृत्रिम खाता सिर्जना गरेर ८२ लाख रुपैयाँ हिनामिना गरेको दाबी गरेको छ ।
प्रदेश सहकारी रजिस्ट्रार कार्यालयले मुख्य योजनाकारका रूपमा यी व्यक्तिहरूलाई औंल्याउँदै अन्य पदाधिकारीमाथि पनि अनुसन्धान अघि बढाउन सिफारिस गरेको छ ।
यसअघि सूर्यदर्शन सहकारी प्रकरणमा जैसीकै जाहेरीका आधारमा रवि लामिछाने पहिलोपटक पक्राउ परेका थिए । उक्त प्रकरणमा जीवी राईसहित १९ जनाविरुद्ध सुरुमा मुद्दा दायर भएको थियो भने पछि पूरक प्रतिवेदनका आधारमा लामिछानेसहित ५१ जनालाई प्रतिवादी बनाइएको थियो ।
सहकारी ठगी, सम्पत्ति शुद्धीकरण र संगठित अपराधअन्तर्गत दायर मुद्दामा १ अर्ब ५१ करोड रुपैयाँ बिगो दाबी गरिएको थियो । सोही मुद्दामा लामिछाने ८४ दिन हिरासतमा बसेपछि ६५ लाख धरौटीमा छुटेका थिए ।
कृष्णप्रसाद जैसी सूर्यदर्शन सहकारीका पीडितहरूको आन्दोलनमा अग्रमोर्चामा रहेका व्यक्ति मानिन्छन् । उनी आन्दोलनकै क्रममा सहकारी पीडितको पीडा सार्वजनिक गर्दै चर्चामा आएका थिए ।
