अमेरिकाको गृह सुरक्षा विभागले आइतबार एक नयाँ नीति घोषणा गर्दै अवैध रूपमा बसिरहेका आप्रवासीहरूलाई स्वदेश फर्किन हौसला दिन नगद तथा यात्रा सहायता प्रदान गर्ने जानकारी दिएको छ ।
राष्ट्रपति डोनाल्ड ट्रम्पले लाखौं अवैध आप्रवासीहरूलाई अमेरिका बाट हटाउने अठोट दोहोर्याएसँगै, यो कार्यक्रम स्वेच्छिक रूपमा स्वदेश फर्किने आप्रवासीहरूको संख्या बढाउने उद्देश्यले ल्याइएको हो ।
विभागले बताएअनुसार, अमेरिका छोड्न इच्छुक आप्रवासीहरूलाई एकतर्फी हवाई टिकट निःशुल्क उपलब्ध गराइनेछ र उनीहरू स्वदेश फर्किएको पुष्टि गरेमा थप एक हजार अमेरिकी डलर दिइनेछ । स्वदेश फर्किएको पुष्टि गर्न आप्रवासीहरूले सीबीपी होम एप प्रयोग गर्न सक्नेछन् ।
यस कार्यक्रममा सहभागी हुनेहरूलाई भविष्यमा नियन्त्रण तथा जबरजस्ती हटाउने प्राथमिकतामा नराखिने र यदि उनीहरूले कानुनी बाटोबाट पुनः अमेरिका प्रवेश गर्न चाहन्छन् भने त्यसको सम्भावना कायम रहन सक्ने पनि विभागले जनाएको छ ।
बिभागका अनुसार, कम्तिमा एक आप्रवासीले यो सुविधा प्रयोग गरी हालै होन्डुरस फर्किएका छन् भने अन्य केहीको लागि आगामी साताका लागि टिकट बुक गरिएको छ । यो नीति मानवीय र व्यवहारिक विकल्पका रूपमा ल्याइएको बताइएको छ ।
