प्रधानमन्त्री ओलीकै सहमतिमा भारतले नयाँ नक्सा सार्वजनिक गरेको देउवाको आरोप

२०७६ मंसिर ८, आईतवार ११:११

पोखरा— नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओलीको सहमतिमा नै भारतले नयाँ राजनीतिक नक्सा तयार पारेर सार्वजनिक गरेको अरोप लगाएका छन् ।

पूर्वप्रधानमन्त्रीसमेत रहेका सभापति देउवाले शनिबार पोखरामा प्रधानमन्त्री ओलीप्रति यस्तो आरोप लगाएका हुन् ।

नेपाली कांग्रेस पोखराले शनिबार आगामी मंसिर १४ गते हुन गइरहेको प्रतिनिधिसभा सदस्यको उपनिर्वाचन लक्षित गरेर आयोजना गरेको आमसभालाई सम्बोधन गर्दै सभापति देउवाले प्रधानमन्त्री ओलीकै सहमतिमा नेपाली भू-भाग भारतको नयाँ नक्सामा समेटिएर मात्र सार्वजानिक भएको बताए । उनले भारतसँग ओलीको सम्झौता भएको हुन सक्ने बताए ।

‘भारतले हाम्रो प्रधानमन्त्री ओलीसँग नै सम्झौता गरेर मात्र नयाँ नक्सा बनाएको हो । यदि होइन भने नेपाली भू–भाग मिचिएको प्रष्ट हुदाँहुदै सरकारले किन पहल गर्दैन ?’ देउवाले भने । नक्सा सम्बन्धी छलफलको लागि पहल नगरेकाले नै भारतको नक्सामा ओलीको सहमति देखिएको उनको आरोप छ ।

देउवाले चुनावी सभामा ओली सरकारले जनताको ढाड सेक्ने गरी कर लगाएको पनि आरोप लगाएका थिए । ‘ओली सरकार भ्रष्टाचारी सरकार भयो,’ उनले भने, ‘जनतालाई उठ्नै नसक्ने गरी कर लगाउने र आफूहरुले कसरी भ्रष्टचार गर्ने भन्ने तर्फ नै ध्यान लगाए । जनताको दुःखलाई सम्बोधन गर्नुको सट्टा झन् खाडल खनेर पसाल्ने मात्र काम भयो । यसरी देश कसरी उभो लाग्छ ?’

सरकारले अहिले अनावश्यक रवैया देखाएको बताउँदै देउवाले उपनिर्वाचनमा ओली सरकारलाई चुनौती दिन पनि कांग्रेसलाई जिताउन मतदातालाई आग्रह गरे । सरकारले जनताविरोधी कार्यक्रम गरेको उनको भनाइ छ । उपनिर्वाचन कांग्रेसलाई मतदान गरे कम्युनिष्ट सरकारलाई थप भ्रष्टाचारी हुनबाट जोगाउन कांग्रेसले पहल गर्ने उनको भनाइ थियो ।

कास्की २ मा नेपाली कांग्रेसबाट खेमराज पौडेल चुनावी मैदानमा उत्रिएका छन् । पौडेलले जिते लोकतन्त्रकै जित हुने उनले बताए । वर्षौंदेखि कास्कीका जनताको सेवा गरेका खेमराज मतदाताको रोजाइमा पनि परेको उनले बताए । उनले मतदाता रिझाउँदै रुखमा भोट आउनेमा ढुक्क रहेको बताए ।

सम्बन्धित समाचार