अमेरिकाको टेक्सास राज्यको अष्टिन शहरमा आइतबार टेस्लाले आफ्नो लामो समयदेखि प्रतिक्षामा रहेको रोबोट्याक्सी सेवा पहिलोपटक सडकमा परीक्षणका रूपमा सञ्चालन गरेको छ । कम्पनीले सार्वजनिक गरेको भिडियोहरूमा आमन्त्रित केही विश्लेषक, प्रभावशाली व्यक्ति (इनफ्लुएन्सर) र शेयरधनीहरूलाई उक्त सेवामा सहभागी गराइएको देखिन्छ ।
हाल परीक्षणका रूपमा सञ्चालनमा ल्याइएका केही सवारी साधनहरूमा सुरक्षा उपाय स्वरूप एक जना मानव सहचालक सिटमा बसेको उल्लेख गरिएको छ ।
टेस्लाका प्रमुख कार्यकारी एलन मस्कले यो सुरुआतलाई “एक दशक लामो कठिन परिश्रमको फल” भन्दै टेस्लाको आर्टिफिसियल इन्टेलिजेन्स र चिप डिजाइन टोलीलाई बधाई दिएका छन् । उनका अनुसार टेस्लाका चिप र सफ्टवेयर विकास टोलीहरू पूरै टेस्लाभित्रै तयार पारिएको हो ।
मस्कले केही दिनअघि रोबोट्याक्सी सवारीको भाडा “४.२० डलर फ्ल्याट शुल्क” हुने भन्दै व्यंग्यात्मक ट्वीट गरेका थिए । यद्यपि हाल सञ्चालनमा ल्याइएका सवारीहरू टेस्लाका परम्परागत गाडीहरू नै हुन्, जसमा सानो “रोबोट्याक्सी” लोगो मात्र राखिएको छ । टेस्लाको चर्चित “वी, रोबोट” कार्यक्रममा सार्वजनिक गरिएको भविष्यको साइबरक्याब भने हालको फ्लीटमा सामेल गरिएको छैन ।
टेस्लाको यो ‘लो–की’ सुरुआतसँगै कम्पनीले अमेरिकी र चिनियाँ बजारमा अगाडि रहेका अन्य चालकविहीन सवारी सेवाहरूलाई टक्कर दिने तयारी गरेको संकेत दिएको छ । गूगलको मातृ कम्पनी अल्फाबेटको स्वामित्वमा रहेको वाइमो र अमेजनको जुक्सलगायतका कम्पनीहरू हालै अष्टिन, फिनिक्स र सनफ्रान्सिस्कोमा स्वचालित ट्याक्सी सेवा दिइरहेका छन् ।
विश्लेषक पॉल मिलरका अनुसार टेस्लाले आफ्नो क्यामेरामा आधारित सस्तो प्रविधि, ठूलो मात्रामा उत्पादन हुने गाडी र एकत्रित डेटाको भरमा प्रतिस्पर्धीलाई पछि पार्ने दाबी गरे पनि, यसमा अझ धेरै प्रगति आवश्यक देखिन्छ ।
टेस्लाको पूर्ण स्वचालित प्रणालीमाथि अमेरिकी नियामक संस्थाहरूले सुरक्षासम्बन्धी अनुसन्धान गरिरहेका छन् । साथै, यो प्रणालीले अपेक्षित सफलता नदिएमा, टेलिअपरेटिङ्ग (दूर नियन्त्रित) चालकहरूको सहयोगमा सेवा सञ्चालन गर्नुपर्ने सम्भावना देखिएको छ, जसले खर्च बढाउने छ ।
यसैबीच, अन्य कम्पनीहरू पनि चालकविहीन सवारी सेवामा आफ्नो पकड बलियो बनाउने प्रयासमा गरेका छन् । जर्मन कम्पनी भल्सवागनले २०३५ सम्ममा विश्वभर चालकविहीन सवारीको बजार ४५० अर्ब युरो पुग्न सक्ने अनुमान गरेको छ ।
यी प्रविधिहरूमाथि सुरक्षा सम्बन्धी चासोहरू पनि बढ्दै गएका छन् । टेस्लाले भने आफ्नो प्रविधिले पैदलयात्री र साइकल यात्रीहरूका लागि सडकमा सुरक्षा बढाउने दाबी गरेको छ । तर विगतमा जनरल मोटर्सले आफ्नो क्रुज रोबोट्याक्सी परियोजना बन्द गरेको उदाहरणले देखाउँछ कि प्रविधिमा सधैं सफलता हासिल हुँदैन । यसले कहिलेकही दुर्घटना र बढ्दो प्रतिस्पर्धाले बन्द गराउँछ भन्ने देखाएको छ ।
