क्षमताभन्दा दोब्बर यात्रु बोकेको जीप शुक्रबार साँझ रुकुम पश्चिमको बाँफिकोट गाउँपालिका–७ लिस्ने भीरबाट खस्दा आठ जनाको मृत्यु भएको छ । दुर्घटनामा चालकसहित १० जना घाइते भएका छन् ।
प्रहरीका अनुसार त्रिवेणी गाउँपालिकाको सिम्रुतुबाट पाँच वटा प्रहरी पोस्ट पार गर्दै यात्रु ओरालेर गन्तव्यतर्फ गइरहेको जीप साँझ करिब ५ बजेतिर दुर्घटनामा परेको हो । आठबीसकोटको स्यालाखदी र गोतामकोटलाई जिल्ला सदरमुकामसँग जोड्ने निर्माणाधीन सडकखण्डमा रा १ ज ४२२ नम्बरको उक्त जीप सडकबाट करिब ७ सय मिटर तल खसेको प्रहरीले जनाएको छ ।
नौ जनाको क्षमता भएको जीपमा १८ जना यात्रु सवार थिए । क्रिस्चियन समुदायले त्रिवेणी गाउँपालिकाको सिम्रुतुमा आयोजना गरेको ‘जवान संगती’ कार्यक्रममा सहभागी भएर घर फर्कँदै गरेका यात्रु उक्त दुर्घटनामा परेका हुन् ।
घाइते नवीन एरीका अनुसार चालकले प्रहरी पोस्ट पार गर्न यात्रुहरूलाई बीचबीचमा ओराल्दै ल्याएको र केही पर गएपछि गाडीको कुनै पार्ट भाँचिएको बताएलगत्तै जीप अनियन्त्रित भएर भीरमा खसेको बताएका छन् । “चारवटा प्रहरी पोस्टमा केही यात्रु ओरालेर पार गरेको थाहा छ । केही पर गएपछि ड्राइभरले कुनै पार्ट भाँचिएको कुरा गर्ने बित्तिकै गाडी खसिहाल्यो । पछाडि बसेका हामी हाम फालेर बाँच्यौं,” एरीले भने ।
दुर्घटनामा परी आठबीसकोट नगरपालिका–१ का टेकजंग बुढा, कल्पना नेपाल र दिलमाया बुढा, वडा २ का मनिका ओली, शर्मिला विक, गोपाल ओली र सविता विक तथा वडा ३ की कमला ओलीको मृत्यु भएको छ ।
दुर्घटनामा चालकसहित अन्य १० जना घाइते भएका छन् । घाइतेमध्ये ७ जनाको उपचार जिल्ला अस्पतालमा भइरहेको छ भने गम्भीर घाइते ३ जनालाई थप उपचारका लागि नेपालगञ्ज पठाइएको प्रहरीले जनाएको छ ।
प्रहरीले दुर्घटनाको कारणबारे थप अनुसन्धान भइरहेको जनाएको छ ।
