अश्विनी नक्षत्रका पुरुष कस्ता? महिला कस्ता? कति वर्षमा के हुन्छ, के व्यवसाय फाप्छ?

प. उद्ववराज शास्त्री
(साहित्य, भागवत, ज्योतिषाचार्य)

आदरणीय पाठकवृन्द पछिल्ला अंकहरुमा हामीले मेषदेखि मीत राशि सम्म जन्म भएका मासिनहरुको रुप गुण एवं लाभ हानी इत्यादिनको विषयमा चर्चा ग-यौ । अब हामी कुन कुन नक्षत्रमा जन्मेका मानिसहरुको स्वभाव लक्षण शुभ अशुभ एवं लाभ हानी के कस्तो हुन्छ । त्यस सम्बन्धमा चर्चा गर्नेछौ ।

पूर्वी दर्शनमा २७ नक्षत्र अश्विनी भरणी कृतिका रोहिणी इत्यादि नामका हुन्छन् । कुनै आचार्यको मतमा अभिजित पनि छुट्टै नक्षत्र हुनाले २८ नक्षत्र पनि हुन जान्छ । मुख्यतः अभिजितलाई नलिइने हुनाले यहाँ क्रममा २७ नक्षत्रको वर्णन गरिन्छ ।

अश्विनी नक्षत्र

चु चे चो ला । यी अक्षरबाट नाम प्रारम्भ हुने मानिसहरुको नक्षत्र अश्विनी हो । यस नक्षत्रामा जन्म हुने मानिसहरु सदैव परोपकार एवं सेवा गर्ने भाव भएका, नम्र सत्युक्त, सम्पूर्ण प्रकारको सम्पत्ति प्राप्त गरको, पत्नी वा पति, सन्तान र आभुषण इत्यादिद्वारा सन्तोष प्राप्त भएका हुन्छन्–यथा–
सदैव सेवाभ्यदितो विनीतः सत्यान्वितः प्राप्तसमस्तसंपत ।
योषाविभुषात्मज भुरितोषः स्यादाश्विनी जन्मनि मानवस्य ।।

यो नक्षत्रको ० अंशदेखि १३ अंश २० कलासम्म नक्षत्र स्वामी अश्विनी कुमार हो भने मेष राशिको पहिलो नक्षत्र हुनाले राशि स्वामी मंगल हुनेछ । यस नक्षत्रको क्षत्रीय वर्ण, अश्व योनि, महिष(भैसी), वैश्योनि, देव गण, आद्य नागे, अश्ववाहन, चरसंज्ञक, पूर्व दिकद्वारी, अग्नि तत्व र रात्रिवलि राशि हो । वास्तवमा अश्विनी नक्षत्रले नै समुचि मेष राशिको प्रतिनिधित्व गर्दछ ।

अश्विनी नक्षत्रद्वारा प्रभावाधिन व्यक्ति राम्रो पढे लेखेको तथा कैयौं विषयको ज्ञाता हुन्छ । तर कुनै एक विषयको विशेषज्ञ भने नगण्य मात्रमा हुन्छ अर्थात बहुत कम मात्रमा समाजमा देखिएको छ । गुप्त विद्यामा यिनीहरुको गहिरो रुचि रहेको हुन्छ । यिनीहरु अत्यन्त सुन्दर एवं भाव्यका धनी हुन्छन् । प्रत्येक कार्यमा निपुणता प्राप्तिका लागि भरमौजदुर प्रयत्न गर्दछन् । समाजमा प्रतिष्ठित महानुभावसँग सम्बन्ध बनाउने चुक्दैनन् । सुन्दर अलंकार एवं वस्त्रद्वारा सजिएका यिनीहरु तीव्र वुद्धिमान एवं शान्त स्वभावको प्रदर्शन गर्दछन् । अकारण नै अधिक खर्च गर्दछन् । यिनीहर आफ्नो निश्चयप्रति दृढ संकल्पित रहन्छन् । ती मानहरुसँग पुरै मोहित हुन्छन् जो आफूसँग प्रेम गर्दछन् । मित्रताको निर्वाह राम्ररी जीवन पर्यन्त निभाउने प्रयत्न गर्दछन् । ठुलाठुला मानिसहरु समेत यिनीहरु सल्लाहकार हुन्छन् । प्रत्येक कार्य सोचसमझका साथ गर्नु यिनीहरुको विशेष गुण हो ।

अश्विनी नक्षत्रका महानुभावहरुको स्वास्थ्य राम्रो हुन्छ तर ग्रहस्थितिको कारण गम्भीर रुपले अस्वस्थताको समेत सामना गर्नुपर्दछ । विशेषतः सिरछेद, ह्दयविकार, टाउकोमा चोटपटक, मानसिक रोग, मलेरिया, अनिद्र वा नाडी विकारको सम्भावना अधिक हुन्छ ।

यस राशिका महिलाहरु पढेलेखेका एवं वद्धिमान हुनुका साथै घरेलु कार्यमा पूर्ण रुचि राख्दछन् । यिनीहरुको आँखा अत्यत्त सुन्दर एवं आकर्षक हुन्छ । मिठो बोलीका कारण यिनीहरु सजिलै पुरुषहरुको मन आकर्षित गर्न सक्छन् । तर मानसम्मानको कारण यसो गर्न सक्दैनन । यिनीहरुको ह्दय अत्यन्त सफा हुन्छ । पतिका साथमा हुदाँ यिनीहरु अत्यन्त कामुक हुन्छन् । यिनीहरुको गृहस्थ जीवन सुखमय हुन्छ । यिनीहरु मध्यम कदका हुन्छन् । यदि यी स्त्रीहरु नोकरी गर्दछन् भने अवश्य उच्च पदमा पुग्छन् । यिनीहरु महिनावारीको समयमा र प्रसवकालमा भारी कष्टको अनुभव गर्दछन् ।

कुन कुन व्यवसाय फाप्ने ?

कल कारखाना, हतियारको काम, वकिल न्यायालयको काम, चलचित्र सम्बन्धी, खेलौना, सामानको विक्रेता, फलाम, धातु तथा कृषि, पशु व्यापार आदि ।

नोकरी कस्तो शुभ ?

सेना, पुलिस, डाक्टर, वैद्य अथवा अस्पतालको कर्मचारी इत्यादी ।

कतिकति वर्षमा कस्तो होला ?

जन्मदेखि ४ः वर्षसम्म केतु र भ्रामरी हुनाले रोग, व्याधि, घाउखटिरा र चोटपटकको भय ।
५ देखि ९ः राम्रो निरोगी हृष्टपुष्ट, आज्ञाकारी ।
१०–१५ः (उल्का) रोग, व्याधि सामान्य, मित्रवियोग, वृद्धिले काम नगर्ने, अटेरी, विदेश यात्रा ।
१९–२२ः विद्यामा सिद्धि, धन मानसम्मान प्राप्ति, विवाह, आँटेको पुग्ने शुभबेला ।
२३–२८ः दुःख, झगडा, हानी, धन नोक्सान, स्त्रीकष्ट ।
३१–३२ः मांगलिक कार्य, उत्साह ।
३४–३६ः गरगहना, धातु, मोटरगाडी प्राप्त, राजसम्मान, भाग्योदय ।
३७–४०ः भ्रामरी राहुको योग हुनाले अनिष्ट, चिन्ता, रोग, भय, स्त्रीमा कष्ट, धननाश ।
४१–४५ः धनधान्य वृद्धि, उच्च प्रतिष्ठित महानुभाव मिलन, मित्र समागम ।
४६–५१ः कार्यमा बाधा, उथलपुथल, आफन्तसँग वैरभाव, सानो सानो कुरामा विवाद ।
५२–५८ः भाग्योदय, सुख सन्तोष, कार्यसिद्धी ।
५९–६६ः खडगो, कष्ट ।
३३ वर्षमा पनि खड्को । ६९–७० मा पनि खड्गो ।

के गर्नु उत्तम ?

यो नक्षत्र मानिसहरुलाई शीरको रोग, चोटपटक, खत, खटिरा, रक्तको कमी, दिमागको गढबढी, जरो, पक्षघात जस्ता विरामी आउने हुने जीवनभर मंगल चौथीमा उपवास राखी गणेशजीको उपासना शुभ ।
विशेष ध्यान दिनुपर्नेः
यस नक्षत्रमा जन्मने मानिसहरुको ५० प्रतिशत विवाह असफल भएको अर्थता २–३ विवाह भएको देखिएको छ । पत्नी वा पतिबाट असन्तोष, जन्मस्थानबाट सर्नुपर्ने, दाजुभाइबाट मद्दत नमिल्ने, जीवनमा झमेलाहरु आइपर्ने हुनाले विवाह गर्दा गणगुण मिलाएर मात्र गर्नु बुद्धिमानी ठहर्छ । ठुलाठुला कार्यगर्दा शुभयोग शुभसाइत पारेर आरम्भ गर्दा सफलता प्राप्त हुनेछ ।

अस्तुः