६ जेष्ठ २०८१, आइतबार | Mon May 20 2024

सहकारी घूस लिएको आरोप लागेका कुश्माका प्रशासकीय अधिकृत पक्राउ



पोखराको मित्रमिलन सहकारीबाट एक करोड पाँच लाख घूस लिएको आरोप लागेका सहकारी रजिष्ट्रारको कार्यालय गण्डकीका तत्कालिन रजिष्ट्रार उदयबहादुर पराजुली पक्राउ परेका छन् ।

जिल्ला प्रहरी कार्यालय पर्वतको टोलीले उनलाई बुधबार पर्वत सदरमुकाममा रहेको कुश्मा नगरपालिकास्थित आफ्नै कार्यालयबाट पक्राउ गरेको हो । हाल उनी कुश्मा नगरपालिकाको प्रशासकीय अधिकृत थिए । उनले हाल संकटग्रस्त रहेको मित्रमिलन सहकारीको कार्यक्षेत्र बिस्तार गर्ने क्रममा १ करोड ५ लाख रुपैयाँ नगद घूस लिएको आरोप छ ।

मित्रमिलन सहकारीले रकम फिर्ता नगरेको भन्दै अध्यक्ष रमण पौडेलसहित ३२ जनाविरुद्ध १८ करोड २३ लाख ४४ हजार १७ रुपैयाँ बिगो दाबीसहितको प्रतिवेदन तयार पारेको छ ।

सोही प्रतिवेदनले पराजुली दोषी भएको ठहर गरेको थियो । पराजुली दोषी पाइएपछि कास्की प्रहरीले उनलाई पक्राउ गर्न पर्वत प्रहरी गुहारेको थियो । उनलाई जिल्ला प्रहरी कार्यालय कास्की ल्याइएको छ ।

मित्रमिलन सहकारीका अध्यक्ष रमण पौडेलसहित ५ जना चाहिँ यसअघि नै पक्राउ परिसकेका छन् । पक्राउ पर्नेमा सदस्य गोपाल खनाल, कार्यकारी अधिकृत किरण अधिकारी, सल्लाहकार सदस्य राजु बराल र सेयर सदस्य बुद्धिसागर पौडेल रहेका छन् । यो सहकारीमा ३ हजार ४४६ जना बचतकर्ता रहेका थिए ।

प्रकाशित मिति : ११ पुस २०८०, बुधबार  ६ : २१ बजे