मदिराको तालमा ग्याङफाइट हुँदा ललितपुर महानगरपालिका–२६ ढोलाहिटीमा दुई जनाको आइतबार राती मृत्यु भएको छ । प्रहरीका अनुसार मदिरा सेवनका क्रममा दुई समूहका युवाबीच सामान्य विषयमा विवाद सिर्जना हुँदा चक्कु हानाहान भएको र दुई जनाको मृत्यु भएको हो ।
मृत्यु हुनेमा पाँचथर घर भई ढोलाहिटी बस्ने २८ वर्षीय रोबस राई र सुनसरी घर भएका ३० वर्षीय पुजन राई रहेका छन् । उनीहरु दुबै जना फरक फरुक समूहका रहेको बताइएको छ । हत्यामा संलग्नको आरोपमा प्रहरीले दुई समूहका गरी १८ जनालाई पक्राउ गरेको छ ।
प्रहरीले उनीहरुबीच ठूलो रिसइबी अहिलेसम्म केही नदेखिएको तर एउटा समूहले अर्को समूहलाई हेप्ने र दबाउने गरेको भन्ने मात्र जानकारीमा आएको बताएको छ । सामान्य रिसइबी भएका दुई समूहका युवाहरुले अत्यधिक मदिरा सेवनको गरेको अवस्थामा झडप भएको प्रहरीको प्रारम्भिक अनुसन्धानले देखाएको छ ।
आइतबार राति दुई समूहका युवाहरु होलीमा रङ खेलेर राति खाजा खान ढोलाहिटीको डी पोपिना खाजाघरमा पुगेका थिए । सोही क्रममा उनीहरुले मदिरा सेवन गरेका थिए । घटना भएको डी पोपिना खाजाघरका तीन सञ्चालकमध्ये एक विजय राई आइतबार घटना भएको बेला खाजाघरमै थिए । हत्यामा उनको पनि संलग्नता देखिएको बताइएको छ ।
